नागपूर - नागपूर रेडलाईट वस्ती हटवण्याच्या मुद्यावर वातावरण तापले आहे. वस्ती उठवणे आणि खुली करणे, या दोन्ही बाजूचे आंदोलन समोरा समोर आले. गंगा जमुना समोरच्या मुख्य रस्त्यावर आज (रविवारी 22 ऑगस्ट) रोजी चांगलाच राडा पाहायला मिळाला.
हेही वाचा - 'त्या' दोन खासदारांविरोधातील याचिका नागपूर खंडपीठाने फेटाळली
नागपूरच्या इतवारा परिसरात गंगा जमुना वस्ती खुली करण्यासाठी राष्ट्रवादीच्या नेत्या ज्वाला धोटे, तर दुसरीकडे गंगा जमुना वेश्या व्यवस्याय हटाव कृती समितीकडून राष्ट्रवादीच्या प्रदेश सरचिटणीस या रस्त्यावर उतरल्या. आज दोन्ही गटाकडून समर्थन आणि विरोध प्रदर्शन सुरू असताना अचानक वातावरण तापले. गंगा जमुना समोरून जाणाऱ्या मुख्य मार्गावर दोन्ही बाजूचे आंदोलन हे समोरा समोर आल्याने गोंधळ उडाला. दोन्ही गट धक्काबुक्की करत एकमेकांच्या अंगावर जात असताना पोलिसांनी त्यांना रोखून धरले. दोन्ही गटाकडून जोरदार घोषणाबाजी करण्यात आली. जवळपास दीड ते दोन तास हा संघर्ष सुरू राहून दोन्ही गट मागे हटायला तयार नसल्याने पोलिसांची दमछाक होत होती. बराच वेळ तणावाच्या वातावरणानंतर पोलिसांनी दोन्ही बाजूच्या आंदोलकांना मागे हटवले.
पोलिसांनी केली वस्ती सील
गंगा जमुना वस्ती म्हणजेच रेड लाईट एरिया असून जवळपास 200 वर्षांपासून या भागात देहव्यापर सुरू असल्याचा दावा वारांगणा यांच्याकडून केला जात आहे. पण कालांतराने परिसराचे स्वरुप वाढले असून जवळपास 12 एकराच्या परिसरात अनेक घरांमध्ये हा देहव्यापार चालत आहे. पण याच वस्तीत मोठ्या प्रमाणात अवैध धंदे ज्यामध्ये अमली पदार्थांची विक्री केली जात आहे. यासोबत अनेक गुन्हेगारांचा वावर या भागात असून या देह व्यापारामध्ये अल्पवयीन मुलींना जोर जबरदस्तीने आणले जात असल्याचे सांगितले जात आहे. यामुळे पोलिसांनी या वस्तीवर एक वर्षासाठी बंदी आणली आहे. हा भाग बॅरिकेटिंग करत पूर्ण परिसर सील करण्यात आला आहे. तसेच स्थानिक नागरिकांनी सुद्धा या वस्तीत चालत असलेल्या देह व्यापरामुळे परिसरात राहणाऱ्या नागरिकांना नाहक त्रास होत असल्याचे म्हणत वस्ती उठवण्याची मागणी केली आहे.
वारांगणाच्या समर्थनात आंदोलन
राष्ट्रवादी काँग्रेसच्या अर्बन सेलच्या अध्यक्षा, तसेच विदर्भ अन्याय निवारण समितीच्या अध्यक्षा ज्वाला धोटे यांनी वारांगणांच्या समर्थनात आंदोलन सुरू केले आहे. पोलिसांनी बंद केलेली गंगा जमुना वस्ती पुन्हा सुरू करण्याची मागणी केली. 15 ऑगस्टलासुद्धा पोलिसांनी लावलेले बॅरिकेटिंग तोडून आंदोलन करण्यात आले होते. ज्वाला धोटे यांचे वडील माजी खासदार कै. जांबुवंतराव धोटे यांना वारांगणा या राखी बांधत असत. यामुळे आज ज्वाला धोटे यांनीही राखी बांधून घेत त्यांच्या रक्षणार्थ रस्त्यावर उतरणार असल्याची भूमिका स्पष्ट केली. यानंतर त्यांनी मुख्य रस्त्यावर लागलेले बॅरिकेटिंग हटवण्याची मागणी केली. त्यानंतर त्या मुख्य रस्त्यावर आल्या.
नागरिकांचे पोलिसांच्या कारवाई समर्थनात आंदोलन
तेच परिसरातील नागरिकांनी या वस्तीमुळे होत असलेल्या त्रासामुळे विरोध सुरू केला आहे. तसेच, पोलिसांनी सील बंद केलेल्या या कारवाईच्या समर्थनात आंदोलन सुरू केले आहे. यासाठी गंगा जमुना वस्ती हटाव कृती समितीची स्थापना केली आहे. यामध्ये नगरसेवक तथा राष्ट्रवादीच्या प्रदेश सरचिटणीस आभा पांडे यांनी या स्थानिक नागरिकांच्या समर्थनात आंदोलनात सहभाग घेतला. यामुळे राष्ट्रवादी काँग्रेस पक्षाच्या दोन महिला नेत्यांची वेगवेगळी भूमिका दिसून आली.
जागा बळकावण्याचा डाव
ही जागा काही बिल्डरलॉबीला घशात घालण्यासाठी हे आंदोलन उभारले जात असून याला ज्वाला देशमुख यांनी विरोध केला आहे. दुसरीकडे मात्र याच परिसरात राहणाऱ्या नागरिकांना या वस्तीमुळे जीवन जगणे कठीण झाल्याचे सांगितले जात आहे. यामध्ये स्थानिक नागरिक या भागातून या वस्तीमुळे घर सोडून गेले आहेत. अनेकांचे विवाह रखडले आहेत. यामुळे नागरिकांना कंटाळून पोलिसांनी केलेल्या कारवाईला समर्थन देत वस्ती हटवण्याची मागणी कृती समितीच्या वतीने केली आहे.
दोन्ही बाजूच्या आंदोलनाला सावरताना पोलिसांची दमछाक
रविवारी झालेला राडा पाहता हा वाद अद्याप थांबणार नसून यामध्ये मोठ्या राजकीय मंडळींची भूमिका अद्याप स्पष्ट झालेली नाही. यामुळे या पुढे या आंदोलनाचे काय स्वरुप असणार याकडे लक्ष लागले आहे. यावेळी दोन्ही गट समोरासमोर आले असताना पोलीस उपायुक्त लोहित मतानी यांच्यासह वरिष्ठ अधिकारी आणि वरिष्ठ पोलीस निरीक्षक पराग पोटे यांच्यासह अनेक मोठा फौजफाटा यावेळी होता. पोलिसांची दोन्ही आंदोलक समोरा समोर आले असताना कुठलाही अनुचित प्रकार घडू नये यासाठी चांगली दमछाक झाली. यावेळी तब्बल दीड ते दोन तासांनी पोलिसांनी दोन्ही बाजूच्या आंदोलकांची समजूत काढत मागे हटवले. पण, यावेळी दोन्ही बाजूने विरोधात घोषणाबाजी केली.
हेही वाचा - नागपूरच्या तरुणाच्या हातात विघ्नहर्ताचा वास; तयार केलेल्या बाप्पाच्या मूर्तींना मोठी मागणी
