आर्थिक विवंचनेतून फेसबुक लाईव्ह करत कलाकाराचा आत्महत्येचा प्रयत्न

कोरोनाच्या संकटामुळे काम बंद झाल्याने आर्थिक संकटाला कंटाळून एका कलाकाराने आत्महत्येचा प्रयत्न केला. विशेष म्हणजे फेसबुकवर लाईव्ह जात शनिवारी सायंकाळी स्वतःला जखमी करून घेत आत्महत्येचा प्रयत्न केला.

नागपूर - कोरोनाच्या संकटामुळे काम बंद झाल्याने आर्थिक संकटाला कंटाळून एका कलाकाराने आत्महत्येचा प्रयत्न केला. विशेष म्हणजे फेसबुकवर लाईव्ह जात शनिवारी सायंकाळी स्वतःला जखमी करून घेत आत्महत्येचा प्रयत्न केला. त्याने कर्जबाजारीपणा आणि काम नसल्याने नैराश्यातून आत्महत्येचा प्रयत्न केला असल्याचे बोलले जात आहे. प्रवीण मुन असे व्यक्तीचे नाव असून तो गायक आहे. दोन दिवसांपूर्वी मनपामध्ये महापौर यांच्या दालनासमोर केलेल्या आंदोलनात सहभाग घेतला होता.

नागपूर शहरातील कलावंत गायक म्हणून प्रसिद्ध असलेले प्रविण मुन हा गायक म्हणून आपल्या कलेतून काही शिकवणी देत असेच कलेतून कुटुंबाचा उदरनिर्वाह करतो. पण कोरोनाच्या संकटात सार्वजनिक कार्यक्रमावर बंदी आल्याने आर्थिक अडचणीतून तो जात होता. दरम्यान त्याच्यावर कर्ज झाले असून ते परत मागण्यासाठी लोक येत असल्याचेही तो फेसबुक लाईव्हमध्ये सांगत होता. त्यांना पैसे कुठून देऊ, असे म्हणत त्याने हातावर जखम करून घेतली. यावेळी मुलीने रोखण्याचा प्रयत्न केला तेव्हा मरू दे, असेच म्हणत राहिला.

मित्रांनी नेले दवाखान्यात -

यावेळी घरात पत्नी आणि मुलगी राहत होती. या प्रकाराची माहिती पत्नीने मित्रांना दिली. त्यानी घरी जाऊन त्याला रुग्णालयात दाखल केले. त्याच्यावर उपचार करत त्याला सुट्टी देण्यात आले असल्याची माहिती पुढे येत आहे.

हे ही वाचा - महाराष्ट्राला बदनाम करण्याचा भाजपचा उद्योग, विधानसभेचा उपयोग अंबानी कुटुंबासाठी - नाना पटोले

काम बंद असल्याने जगावे कसे यासाठी केले आंदोलन -

नागपुरात कोरोनाचे संकट भेडसावत असताना लग्न समारंभावर, सांस्कृतिक, सार्वजनिक कार्यक्रमांवर बंदी घालण्यात आली आहे. यामुळे अनेक कालाकारांना काम मिळत नसल्याने त्यांनी बेरोजगारीचा प्रश्न मांडण्यासाठी महापौर दयाशंकर तिवारी यांच्या दालनासमोर आंदोलन करत आपली व्यथा मांडली. यावेळी प्रवीण मुन सह अन्य कलाकार मंडळींनी यात सहभाग घेतला होता.