ठाणे : शिवसेना-भाजपची युती 2014 पासून होती, आहे आणि यापुढेही असेल, असे सांगून शिवसेना पक्षप्रमुख उद्धव ठाकरे यांनी ठाण्यात युतीवर भाष्य केले आहे. ठाणेकरांनी अनेक वर्षांपासून भगवा उराशी बाळगला असून शिवसेनेने ठाण्याला भव्य नाट्यगृह देखील दिले आहे. त्यामुळे आता ज्यांना नाटके करायची आहे त्यांना करू द्या, असा टोला देखील ठाकरे यांनी लगावला. चार वर्षांपूर्वी 'शिवआरोग्य' ही योजना राबवण्याचा प्रस्ताव तयार करण्यात आला होता. मात्र, ही योजना राबवता आली नाही. भविष्यात सामाजिक संस्थांच्या माध्यमातून दाते मिळाले तर ही योजना राबवून महाराष्ट्र निरोगी करू, असे आश्वासनही उद्धव ठाकरेंनी यावेळी दिले.
आगामी विधानसभा निवडणुकीच्या पार्श्वभूमीवर शिवसेनाप्रमुख उद्धव ठाकरेंच्या हस्ते ठाण्यात विविध वास्तूंचे लोकार्पण करण्यात आले. यामध्ये हजुरी येथे 'जितो' ही सामाजिक संस्था आणि ठाणे महापालिका यांच्या संयुक्त विद्यमाने सुसज्ज रुग्णालयाचे उद्घाटन, उथळसर येथील महापालिकेच्या शाळेची पुनर्बांधणी, सामान्य रुग्णालयाच्या सुपरस्पेशालिटी कामाच्या शुभारंभ, फायरब्रिगेड येथील नूतनीकरण करण्यात आलेल्या स्मशानभूमीचे उद्घाटन आणि गडकरी रंगायतन येथील स्वातंत्रवीर सावरकर यांच्या शिल्पाचा समावेश आहे.
जितो संस्थेचा उल्लेख करताना शहरासाठी काही करण्याची इच्छा असणे, अशी जाणीव असणारे लोक फार कमी असल्याचे सांगत उद्धव ठाकरे यांनी जितो संस्थेचे कौतुक केले. करून दाखवले या शब्दात खूप सामर्थ्य आहे. २०१४ ला शिवआरोग्य या योजेनचा प्रस्ताव तयार करण्यात आला होता. यावेळी ग्रामीण भागातील रुग्णांचा यात विशेष विचार करण्यात आला. ग्रामीण भागातील रुग्णांसाठी थेट सॅटेलाईटच्या माध्यमातून तपासणी करुन त्यांच्यावर उपचार करण्यात येतील, अशी माहिती त्यांनी दिली. मात्र, जर जितो संस्थेसारखे दाते असल्यास अशी योजना राबवून संपूर्ण महाराष्ट्र निरोगी करू, असे आश्वासन देखील उद्धव ठाकरे यांनी यावेळी दिले. आजकाल जमीन दिसली कि हडप करण्याची प्रथा आहे. मात्र, अशा जागा देणारे दाते अजूनही असल्याने शहरात अनेक चांगल्या वास्तू निर्माण झाल्या असल्याचे त्यांनी सांगितले.
हेही वाचा - नागपूर : आता ग्रामपंचायतीचा कारभार पाहणार मुख्याध्यापक.. विद्यार्थ्यांचं नुकसान?
या कार्यक्रमाला महापौर मीनाक्षी शिंदे, पालिका आयुक्त संजीव जयस्वाल, जितो एज्युकेशन आणि मेडिकल ट्रस्टचे विश्वस्त अजय आशर, शिवसेनेचे सचिव मिलिंद नार्वेकर, उपनेते अनंत तरे आदी मान्यवर उपस्थित होते.
हेही वाचा - केरळमध्ये ओणमचा उत्साह, 'या' मंदिरात वानरांना देण्यात आली 'मेजवानी'
भाजपच्या पदाधिकाऱ्यांची आवर्जून उपस्थिती -
शिवसेनेच्या वतीने विविध प्रकारच्या विकासकामांचा लोकार्पण सोहळा असला तरी, गडकरी रंगायतनमध्ये झालेल्या या मुख्य कार्यक्रमात भाजपच्या नेत्यांनी आवर्जून उपस्थिती लावली होती. यामध्ये आमदार संजय केळकर, एड. निरंजन डावखरे, भाजपचे गटनेते नारायण पवार, ज्येष्ठ नगरसेवक मिलिंद पाटणकर, शहर अध्यक्ष संदीप लेले आणि इतर पदाधिकारी देखील उपस्थित होते. त्यामुळे पालिका आयुक्तांच्या विरोधात एकवटलेले भाजप आणि शिवसेनेचे पदाधिकारी विकासकामांच्या मुद्द्यावरहे एकत्र येताना यावेळी दिसले.
हेही वाचा - नागपूर : आगामी विधानसभा निवडणुकीत राष्ट्रवादी आपली ताकत दाखवेल - जयंत पाटील
