मुंबई - स्वातंत्र्यवीर सावरकर यांच्यावरील गौरव प्रस्ताव मंजूर करण्याची मागणी पुढे येत आहे. कामकाज सल्लागार समितीच्या बैठकीत मुख्यमंत्री उद्धव ठाकरे आणि माजी वित्तमंत्री सुधीर मुनगंटीवार यांमध्ये संबंधित विषयावरून खडाजंगी झाली. या खडाजंगीचे पडसाद बैठकीत उमटल्याने त्यावर काँग्रेसचे नेते विजय वडेट्टीवार आणि भाजपचे नेते मुनगंटीवार यांनी माध्यमांसमोर येऊन खुलासा केला.
अर्थसंल्पीय अधिवेशनत 24 फेब्रुवारीपासून सुरू होत आहे. त्या पार्श्वभूमीवर अर्थसंकल्पीय अध‍िवेशनासाठी कामकाज सल्लागार समितीची बैठक विधानभवनात पार पडली. या बैठकीत सुरुवातीला विधानसभा अध्यक्ष नाना पटोले यांनी ओबीसीच्या जनगणनेचा प्रस्ताव आणण्याची सूचना केली. तर लगेचच माजी वित्तमंत्री सुधीर मुनगंटीवार यांनी स्वातंत्र्यवीर सावरकर यांचा गौरव प्रस्ताव दोन्ही सभागृहात आणून तो एकमुखाने मंजूर करण्याची मागणी लावून धरली.
यामुळे सुरुवातीलाच बैठकीत ओबीसी जनगनणना आणि सावरकर गौरव प्रस्तावामुळे सत्ताधारी आणि विरोधकांमध्ये वाद रंगला. या प्रस्तावावर काँग्रेस आणि राष्ट्रवादीसोबतच मुख्यमंत्री उद्धव ठाकरे यांनीही विरोध दर्शवल्याने चांगलीच खडाजंगी झाली.
कामकाज सल्लागार समितीच्या या बैठकीनंतर मदत व पुनवर्सन मंत्री विजय वडेट्टीवार यांनी माध्यमांसमोर संबंधित प्रकरणावर खुलासा केला. त्यांनी या प्रस्तावाला विरोध केला असून भाजपवर टीका केली. तर मुनगंटीवार यांनी भाजपची बाजू स्पष्ट करताना सावरकरांच्या गौरवाचा प्रस्ताव 26 फेब्रुवारीला विधानसभेत मांडण्याची मागणी केली आहे.
