मुंबई - क्रूझ ड्रग्स प्रकरणी आर्यन खान गेल्या 19 दिवसांपासून न्यायालयीन कोठडीमध्ये आहे. आर्यन खानच्या जामिनासाठी प्रयत्न केले जात आहेत. अभिनेता शाहरूख खान यांची मॅनेजर पूजा ददलानी एनसीबी कार्यालयात दाखल झाली आहे. पूजा ददलानी ही आर्यन खान संबंधी मागितलेली कागदपत्रे अधिकाऱ्यांना सादर करणार असल्याची माहिती आहे. काल देखील शाहरुख खानचा बॉडीगार्ड डॉक्यूमेंट घेऊन आला होता. मात्र, एनसीबी अधिकारी नसल्यामुळे तो परत गेला होता.
आर्यन खानशी झालेल्या चॅटिंगसंदर्भात चौकशी -
आर्यन खानशी अनन्या पांडेचा ड्रग्जसंदर्भात चॅटिंग झाल्याचा संशय एनसीबीला आहे. एनसीबीतर्फे अनन्याची साधारण चार तास चौकशी करण्यात आली. दरम्यान सूर्यास्त झाल्यामुळे अनन्या पांडेची चौकशी संपली. साधारण चार तास ही चौकशी करण्यात आली. अनन्याने एनसीबीला काय उत्तरं दिली हे अद्याप स्पष्ट झालेले नाही. तसेच एनसीबी अनन्याला पुन्हा एकदा समन्स पाठवणार का? तसेच एनसीबी यानंतर कोणता पवित्रा घेणार? या गोष्टी आगामी काळात स्पष्ट होतील.
आर्यनच्या कोठडीत 30 ऑक्टोबरपर्यंत वाढ -
आर्यनचा तुरुंगातील मुक्काम वाढला आहे. आर्यनसह इतर सात जणांच्या न्यायालयीन कोठतीत 30 ऑक्टोबरपर्यंत वाढ केली आहे. 7 तारखेला झालेल्या सुनावणीमध्ये आर्यन खान आणि इतर आरोपींना 14 दिवसांच्या न्यायालयीन कोठडीत पाठवण्याचा निर्णय न्यायालयाने दिला होता. ही न्यायालयीन कोठडीची मुदत संपल्यानंतर पुन्हा सुनावणी घेण्यात आली. यावेळी आर्यन खान आणि इतर आरोपींची पुन्हा 30 ऑक्टोबरपर्यंत न्यायालयीन कोठडीत रवानगी करण्यात आली.
शाहरुखने घेतली आर्यनची तुरुंगात जाऊन भेट -
कोरोनाच्या पार्श्वभूमीवर तुरुंगातील कैद्यांना कोणालाही भेटण्याची परवानगी दिली जात नव्हती. मात्र, प्रादुर्भाव कमी होत असल्याने शाहरुख खानला मुलाला भेटण्याची परवानगी मिळाली. गुरुवारी सकाळी नऊ वाजताच्या सुमारास शाहरुख आर्थर रोड जेलमध्ये दाखल झाला. यावेळी जवळपास दहा मिनिटं दोघांमध्ये बोलणे झाले. बाप-लेकात नेमकी कोणत्या विषयावर चर्चा झाली, वडिलांच्या भेटीनंतर आर्यनच्या काय भावना होत्या, याचा तपशील मिळालेला नाही. तसेच शाहरुखनेही भेटीनंतर कुठलीही प्रतिक्रिया देणे टाळले.
नेमकं प्रकरण काय?
मुंबई एनसीबीचे झोनल डायरेक्टर समीर वानखेडे यांनी 2 ऑक्टोबर रोजी गोव्याला जाणाऱ्या क्रूझवर छापा टाकला होता. यावेळी क्रूझवर रेव्ह पार्टी सुरु असल्याचे उघडकीस आलं होतं. या ठिकाणी अभिनेता शाहरुख खानचा मुलगा आर्यन खानला अटक करण्यात आली होती. आर्यन खान हा सध्या जेलमध्ये आहे. मात्र, त्याच्या चौकशीतून अनेक गोष्टींचा उलगडा झाला आहे. एनसीबी अधिकाऱ्यांनी आर्यनचे whats app चॅट मिळवले होते. यात अनेक प्रसिद्ध व्यक्तींचा समावेश आहे. यात अभिनेत्री अनन्या पांडे हिचंदेखील नाव आहे. आर्यन खान आणि अनन्या यांच्यात ड्रग्सबाबत चर्चा झाल्याचं एनसीबी अधिकाऱ्यांचं म्हणणं आहे. या दोघांमधील चॅट एनसीबी अधिकाऱ्यांनी कोर्टात सादर केले होते.
हेही वाचा - आर्यन खानला 'कस्टडी'त भेटणारी, 'सुटके'साठी तळमळणारी, कोण आहे ही 'भावूक' होणारी पूजा?
