मुंबई - पंतप्रधान नरेंद्र मोदी यांनी व्हॅटिकन सिटी येथे जाऊन पोप फ्रान्सिस यांची भेट घेतली. साधारण तासभर मोदी हे पोप फ्रान्सिस यांच्या सहवासात होते. यावेळी पोप फ्रान्सिस यांनी मोदींना बायबलची प्रत भेट दिली. पोप यांनी भेट दिलेली बायबलची प्रत मोदींनी मस्तकी लावली. भाजपनेही मोदी-पोप भेटीला 'ऐतिहासिक' म्हटले आहे. हेच जर दुसरे कोणी केले असते तर, राष्ट्र, धर्म, संस्कार भ्रष्टच झाला असता व शुद्धीकरण मोहिमा सुरू झाल्या असत्या. असे सांगत, शिवसेनेने अंध भक्तांना टोला लगावला आहे. 'अंध भक्तांनी आता काय करावे, हे मोदींनाच 'मन की बात' मधून सांगावे लागले!' असा चिमटाही शिवसेनेने भाजप आणि त्यांच्या अंगीकृत संघटनांना काढला आहे.
'मोदी हे स्वतःची प्रतिमा सहिष्णू, धर्मनिरपेक्ष असल्याचे सिद्ध करीत असतात'
'युरोप दौऱयावर असलेले आपले पंतप्रधान नरेंद्र मोदी यांनी पोप फ्रान्सिस यांची भेट घेतली. पंतप्रधान मोदी हे पोप यांना भेटण्यासाठी व्हॅटिकन सिटीत गेले. मोदी हे साधारण तासभर पोपसाहेबांच्या सहवासात होते. पोपसाहेबांनी मोदी यांना पवित्र धर्मग्रंथ बायबल दिला व मोदी यांनी अत्यंत श्रद्धेने बायबलची प्रत मस्तकी लावली. मोदींनी दाखवलेल्या या श्रद्धेबद्दल अंधश्रद्धाळू भक्तांना काय म्हणायचे आहे?' असा सवाल शिवसेनेने 'सामना'च्या अग्रलेखातून उपस्थित केला आहे.
'मोदी हे इटलीत गेले व अचानक पोप यांना भेटले. चारेक वर्षांपूर्वी मोदी हे विमान प्रवासात असताना अचानक इस्लामाबादेत उतरले होते व नवाज शरीफ यांना भेटायला गेले होते. कधी नवाज मियाँ तर कधी पोपसाहेब यांना भेटून मोदी हे स्वतःची प्रतिमा सहिष्णू, धर्मनिरपेक्ष वगैरे असल्याचे सिद्ध करीत असतात.' असेही शिवसेनेने म्हटले आहे.
'पोप आणि मोदी भेटीत गरिबी निर्मूलनावर चर्चा'
'जगातील 55 टक्के संपत्तीचे मालक ख्रिश्चन धर्मीय आहेत. त्याखालोखाल 5.8 टक्के मुस्लिम, हिंदू 3.4 टक्के, ज्यू 1.2 टक्के असा क्रम लागतो. म्हणजे जगातील श्रीमंत धर्मगुरूंना भेटायला आपले पंतप्रधान गेले. मोदी व पोप यांच्यात म्हणे जगातील गरिबी निर्मूलन तसेच हवामान बदलावर चर्चा झाली. पोप यांच्या व्हॅटिकन सिटीतून गरिबीचे निर्मूलन झाले आहे. अमेरिका, युरोपातील अनेक ख्रिश्चन देशही आपल्या गरीब जनतेची चांगल्याप्रकारे काळजी घेत आहेत. या राष्ट्रांना आर्थिक महासत्ता म्हटले जाते. मोदी व पोप यांच्यात गरिबी निर्मूलनावर चर्चा झालीच असेल तर आपल्या देशातील गरिबी निर्मूलनाबाबत पंतप्रधान मोदी यांनी पोपसाहेबांना नक्की कोणती माहिती दिली?' असा सवाल शिवसेनेने केला आहे.
'मजुरांची दिवाळी अंधारातच'
'मोदी व पोप यांच्यात चर्चा सुरू असतानाच इकडे 'मनरेगा' म्हणजे महात्मा गांधी राष्ट्रीय रोजगार हमी योजनेत आर्थिक खडखडाट झाल्याचे वृत्त समोर आले. योजनेसाठी असलेला पैसा संपला असून या योजनेवर काम करणाऱया मजुरांची दिवाळी अंधारातच जाणार, असे चित्र निर्माण झाले आहे. देशातील 21 राज्यांत 'मनरेगा'चे काम चालत असते. 2020-21 मध्ये 7.75 कोटी कुटुंबांना या योजनेंतर्गत काम व रोजगार मिळाला. आता ही योजनाच आर्थिक संकटात सापडल्याने हिंदुस्थानातील गरीबांवर मोठेच संकट कोसळले आहे. पोप आणि मोदी भेटीत गरिबी निर्मूलनावर चर्चा झाली म्हणून मनरेगाचा प्रश्न आम्ही येथे मांडला.' असे शिवसेनेने म्हटले आहे.
'भाजपने पोप तसेच ख्रिस्ती समुदायाविषयीचे हे विचार सदैव कायम ठेवावे'
'पंतप्रधान मोदी व पोपसाहेबांची भेट ऐतिहासिक असल्याचे भाजपचे राष्ट्रीय अध्यक्ष डॉ. नड्डा यांनी सांगितले आहे. त्यांनी असेही म्हटले आहे की, 'मोदी-पोप भेट इतिहासाच्या पुस्तकात नोंद करण्यासारखी आहे. शांतता, सौहार्द आणि परस्पर संवादाच्या दिशेने हे मोठे पाऊल आहे. हिंदुस्थान ही सर्वसमावेशक लोकशाही आहे. येथील ख्रिश्चन समुदायाने राजकारण, चित्रपट, व्यवसाय, सशस्त्र सेना यांसारख्या क्षेत्रांत महत्त्वपूर्ण कामगिरी बजावली आहे.' भाजपने पोप तसेच ख्रिस्ती समुदायाविषयीचे हे विचार सदैव कायम ठेवावे.' अशी जगाची अपेक्षा असल्याचा सल्ला शिवसेनेने भाजपला दिला आहे.
पोप यांच्या माध्यमातून ख्रिस्ती धर्म प्रसाराचे काम चालते, असे भाजप व त्यांच्या अंगीकृत संघटनांचे मत होते व आहे. हिंदुस्थानातील धर्मांतरांमागे मिशनरी आहेत असे आरोप भाजपच्या अंगीकृत संघटनांकडून होत असतात. भाजप व संघ परिवाराची पोप तसेच व्हॅटिकनविषयी अंतःस्थ मते काहीही असली तरी पंतप्रधान मोदी हे पोप यांना भेटल्यामुळे ही भेट क्रांतिकारक, ऐतिहासिक आणि जगाला दिशादर्शक वगैरे ठरलीच आहे. मोदी-पोप भेटीने गरिबी निर्मूलन होईलच व हवामान बदलाच्या समस्येवरही मार्ग निघेल.' अशी कोपरखळी शिवसेनेने मारली आहे.
'मूलतत्त्ववाद्यांना कठोर संदेश'
'पोपसाहेबांनी मोदींचे निमंत्रण स्वीकारले व ते दिल्लीत येतील. 1999 साली तेव्हाचे पोप दिल्लीत अवतरले होते. तेव्हाच्या पोप यांना सोनिया गांधी भेटल्या म्हणून तत्कालीन भाजपने भलतेच काहूर माजवले होते, पण पंतप्रधान मोदी पोप यांना नुसतेच भेटले नाहीत तर पोप यांनी भेट दिलेल्या बायबलची प्रत मस्तकी लावली. आपला हिंदू धर्म हेच तर शिकवितो. स्वधर्माचे संरक्षण तर आपण केलेच पाहिजे, पण परधर्माविषयीही आदरभाव ठेवला पाहिजे. अन्य धार्मिक ग्रंथ मस्तकी लावले पाहिजेत अशीच आपल्या धर्माची शिकवण आहे. मोदी यांनी आपल्या या कृतीतून स्वदेशातील मूलतत्त्ववाद्यांना कठोर संदेश दिला. देशात लोकशाही आहे. देश धर्मनिरपेक्ष आहे, असेच मोदींनी 'व्हॅटिकन'मधून जगाला कळवले. मोदी हे अचानक नवाज मियाँना भेटतात, पोप महाराजांनाही भेटतात, हे सर्व मोदींना शोभते. दुसरे कोणी हे सद्सदविवेकबुद्धीने केले असते तर हाय तोबा तोबा! राष्ट्र, धर्म, संस्कार, भ्रष्टच झाला असता व शुद्धीकरण मोहिमा सुरू झाल्या असत्या. अंध भक्तांनी आता काय करावे, हे मोदींनाच 'मन की बात'मधून सांगावे लागेल!' असे शिवसेनेने म्हटले आहे.
