मुंबई - बॉलिवूड अभिनेता सुशांतसिंह राजपूत ( Sushant Rajput Case ) याच्या मृत्यूनंतर समोर आलेल्या ड्रग प्रकरणात नार्कोटिक्स कंट्रोल ब्युरोकडून चौकशी केली जात होती. अभिनेता सुशांत सिंगला रिया चक्रवर्ती ( Riya Chakraborty ) आणि तिचा भाऊ यांनी अनेक वेळा गांजा विकत घेऊन, सुशांत सिंगला दिला असल्याची एनसीबीने एनडीपीएस न्यायालयात दिलेल्या आरोप पत्रात म्हटले आहे. या खटल्याची पुढील सुनावणी 27 जुलै रोजी होणार आहे.
अंमली पदार्थांशी संबंधित बाजू समोर - बॉलीवूड अभिनेता सुशांतसिह राजपूतने 14 जून 2020 रोजी घरात आत्महत्या केली होती. सुशांतच्या मृत्यूनंतर अंमली पदार्थांशी संबंधित बाजू समोर आली, आणि एनसीबीने चित्रपट, टिव्ही वाहिन्यांशी संबंधित लोकांशी चौकशीला सुरूवात केली. सुशांतची मैत्रीण रिया आणि तिचा भाऊ शौविकला अन्य ड्रग्स पेडलर्ससोबत अटक करण्यात आली. त्यापैकी अनेकजण सध्या जामीनावर आहेत. एनसीबीने मागील महिन्यात या प्रकरणाशी संबंधित 35 आरोपी विरोधात विशेष एनडीपीएस न्यायालयात आरोपांचा मसुदा दाखल केला होता. तो उपलब्ध करण्यात आला आहे.
अंमली पदार्थांचे अवैधपणे विक्री केली होती - मसुद्यातील आरोपांनुसार सर्व आरोपींनी मार्च ते डिसेंबर 2020 या कालावधी दरम्यान उच्चभ्रू समाज आणि बॉलीवूडमध्ये ड्रग्स खरेदी, विक्री आणि वितरण करण्याचा कट रचला होता. आरोपींनी अमली पदार्थांच्या तस्करीला वित्तपुरवठाही करून गांजा, चरस, कोकेन आणि अन्य अंमली पदार्थांचे अवैधपणे विक्री केली होती. म्हणूनच सर्व आरोपींवर कलम 27 आणि 27अ, 28, 29 यांसारख्या एनडीपीएस कायद्याच्या तरतुदींनुसार आरोप ठेवण्यात आले आहेत.
अमली पदार्थांचे पैसेही दिले असल्याचे एनसीबीत नमूद - तसेच रिया चक्रवर्तीने या प्रकरणातील आरोपी आणि ड्रग्स पेडलर्स सॅम्युअल मिरांडा, शौविक, दीपेश सावंतसह अन्य पडलर्सकडून अनेकदा गांजा सुशांतला दिला आहे. शौविक आणि सुशांतच्या सांगण्यावरून तिने मार्च आणि सप्टेंबर 2020 पर्यंतचे अमली पदार्थांचे पैसेही दिले असल्याचे एनसीबीने नमूद केले आहे. रियाचा भाऊ शौविक अमली पदार्थ तस्करांच्या नियमित संपर्कात होता. तो त्यांच्याकडून गांजा आणि चरसची ऑर्डर घेत असत. पुढे सुशांतकडे सुपूर्द करत असल्याचे एनसीबीने आरोपींच्या मसुद्यात म्हटले आहे. '
मोबाईल व इतर महत्त्वाच्या गोष्टींची चौकशी : गेल्या 2020 मध्ये या प्रकरणाचा तपास सुरू झाला. अनेक अमली पदार्थ जप्त करण्यात आले. मोबाईल फोनही जप्त करण्यात आले. अमली पदार्थांच्या खरेदी-विक्रीसंदर्भातील माहिती मोबाइलमधून घेण्यात आली, असे दोषारोपपत्रात म्हटले होते. आरोपींकडून जप्त करण्यात आलेले अमली पदार्थ, आरोपींनी स्वतःहून दिलेली माहिती तांत्रिक पुरावे, उदा. मोबाइल कॉल्स, व्हाॅट्सॲप चॅट, बँक खात्यांची माहिती, आर्थिक व्यवहार आणि अन्य कागदोपत्री पुरावे विचारात घेऊन खोलवर तपास करण्यात आला, असे तपास यंत्रणेने सांगितले.
तपासात परदेशी चलनदेखील जप्त : तपासादरम्यान देशी, परदेशी चलन जप्त करण्यात आले आणि संबंधित कायद्यांतर्गत कारवाई करण्यात आली. पर्यावरणाचा विचार करून अंदाजे ५०,००० पानांचे दोषारोपपत्र इलेक्ट्रॉनिक फॉर्ममध्ये न्यायालयात सादर करण्यात आले. तपास पुढे सरकल्यावर पुरवणी दोषारोपपत्र सादर करू, असे एनसीबीने सांगितले.
या प्रकरणातील आरोपींची नावे : या चार्टशीटमध्ये रिया चक्रवर्ती तिचा भाऊ शौविक, सॅम्युअल मिरांडा, दीपेश सावंत यांच्यासह एकूण 33 आरोपींची नावे आहे. यामध्ये सारा अली खान आणि श्रद्धा कपूर, दीपिका पादुकोण यांचा जबाब आहे. परंतु, आरोपी म्हणून नाव नाही. मात्र धर्मा प्रोडक्शन्सचा माजी कर्मचारी क्षितिज प्रसाद, अर्जुन रामपालचा मेव्हणा अजीसीलाओस दिमिटरीटास याचेही नाव आहे
नेमके काय आहे प्रकरण : १४ जून २०२० रोजी सुशांत सिंह राजपूतचा मृतदेह संशयास्पद आढळून आला होता. मुंबईतील वांद्रे परिसरात असलेल्या घरात सुशांतने आत्महत्या केली असल्याचे पोलिसांनी म्हटले होते. सुशांतने आत्महत्या केलेली नसून, त्याची हत्या करण्यात आल्याचा आरोपही अनेकांनी केला होता. या घटनेनंतर सुशांतने आत्महत्या केली की, त्याची हत्या झाली? असा वाद सुरू असतानाच ड्रग्जचं प्रकरण समोर आलं होतं. या प्रकरणात एनसीबीने तपास सुरू केला आणि अनेक ठिकाणी छापे टाकत एनसीबीने ड्रग्ज जप्त केले होते. तसेच रिया चक्रवर्ती आणि तिचा भाऊ शौविक चक्रवर्तीसह अनेकांना अटकही करण्यात आली होती.
