'माझ्या उत्तराने ईडीच्या अधिकाऱ्यांचे समाधान झाले की नाही, हे माहीत नाही'

माध्यमांशी बोलताना सरनाईक म्हणाले, की लोकप्रतिनिधी म्हणून ईडी अधिकाऱ्यांनी विचारलेल्या प्रश्नांची उत्तरे मी दिलेली आहेत. अतिशय खेळीमेळीच्या वातावरणात ही चौकशी झाली आहे.

मुंबई- शिवसेना आमदार प्रताप सरनाईक यांची ईडीकडून तब्बल सहा तासांहून अधिक वेळ चौकशी करण्यात आली आहे. माझ्या दिलेल्या उत्तरावरून अधिकाऱ्यांचे समाधान झाले की नाही हे मला माहीत नाही. कर्तव्य पूर्ण केल्याची प्रतिक्रिया सरनाईक यांनी माध्यमांशी बोलताना दिली. टॉप्समधील घोटाळ्यावर कारवाई करावी, अशी लोकप्रतिनिधी म्हणून मागणी केल्याचेही त्यांनी सांगितले.

ईडीच्या अधिकाऱ्यांची चौकशी पूर्ण झाल्यानंतर आमदार प्रताप सरनाईक कार्यालयाबाहेर आले. यावेळी माध्यमांशी बोलताना सरनाईक म्हणाले, की लोकप्रतिनिधी म्हणून ईडी अधिकाऱ्यांनी विचारलेल्या प्रश्नांची उत्तरे मी दिलेली आहेत. अतिशय खेळीमेळीच्या वातावरणात ही चौकशी झाली आहे. अधिकाऱ्यांनी मला माझ्या कुटुंबाविषयी, माझ्याविषयी , माझ्या व्यवसायविषयी व राजकीय प्रश्न विचारले होते. यांची माहिती अधिकाऱ्यांना दिल्याचे सरनाईक यांनी स्पष्ट केले.

टॉप्समध्ये घोटाळा झाला असेल तर आरोपींना शिक्षा करावी, अशी मागणी लोकप्रतिनिधी म्हणून ईडीकडे केली आहे. ईडीने पुन्हा चौकशीसाठी बोलाविले नाही. मात्र, ईडीला नोटीस देण्याची गरज नाही. साधा फोन किंवा ई-मेल केला तरी चौकशीला हजर राहू, असे सांगितल्याची माहिती सरनाईक यांनी दिली.

हेही वाचा-संसदेच्या नव्या इमारतीचा भूमिपूजन सोहळा संपन्न... पंतप्रधान नरेंद्र मोदींनी केली पूजा

ईडीने चौकशीसाठी पाठविले होते समन्स-

सर्वोच्च न्यायालयाकडून शिवसेना आमदार प्रताप सरनाईक यांना दिलासा मिळाल्यानंतर गुरुवारी ईडीकडून समन्स आल्यानंतर ते आज चौकशीसाठी हजर झाले होते. टॉप्स ग्रुपच्या संदर्भात मनी लॉन्ड्रिंगला घेऊन ईडीकडून तपास केला जात आहे. तत्पूर्वी टॉप सिक्युरिटीचा मालक अमित चांदोले आणि टॉप ग्रुपचा माझी एमडी एम शशीधरण या दोघांना अटक करण्यात आली आहे. अटक करण्यात आलेला आरोपी अमित चांदोले हा आमदार प्रताप सरनाईक यांचा निकटवर्तीय असल्याचे सांगितले जाते.

हेही वाचा-रावसाहेब दानवे प्रकरण: शेतकऱ्यांचा अपमान सहन करणार नाही -मंजिंदरसिंग सिरसा

सर्वोच्च न्यायालयाचे कारवाई न करण्याचे आदेश-

शिवसेना आमदार प्रताप सरनाईक यांनी सर्वोच्च न्यायालयात धाव घेऊन या संदर्भात ईडी कुठल्याही प्रकारची कारवाई करू नये, अशी याचिका दाखल केली होती. यावर सर्वोच्च न्यायालयाने आमदार प्रताप सरनाईक यांना दिलासा दिला आहे. ईडीला कुठल्याही प्रकारची कारवाई आमदार प्रताप सरनाईक किंवा त्यांच्या कुटुंबीयांच्या विरोधात करू नये, असे निर्देश दिले आहेत.