मुंबई - ज्येष्ठ अभिनेते रमेश देव यांचे निधन झाले आहे. वयाच्या ९३ व्या वर्षी त्यांनी अखेरचा श्वास घेतला. हृदयविकाराच्या झटक्याने त्यांचे निधन झाले आहे. त्यांच्या निधनावर सर्वच स्तरातून प्रतिक्रिया येत आहे. महाराष्ट्राचे मुख्यमंत्री उद्धव ठाकरेंनी देव यांना श्रद्धांजली वाहिली आहे. मराठी, हिंदी चित्रपटसृष्टीत आपल्या सदाबहार अभिनयाची छाप उमटवणारा, मनस्वी असा अभिनेता आपण आज गमावला आहे, अशा शब्दांत मुख्यमंत्री उद्धव ठाकरे यांनी ज्येष्ठ अभिनेते रमेश देव यांना श्रद्धांजली वाहिली आहे. त्यांनी एक उत्तम कलावंत म्हणून आयुष्यभर कलाक्षेत्राची सेवा केली, असेही मुख्यमंत्र्यांनी आपल्या शोकसंदेशात म्हटले आहे. तर राष्ट्रवादीचे अध्यक्ष शरद पवारांनी ज्येष्ठ अभिनेते रमेश देव यांच्या निधनाने मराठी-हिंदी चित्रपटसृष्टीतला उमदा तारा निखळला. कृष्ण-धवल काळापासून हिंदी चित्रपटांमध्येही अमीट ठसा उमवटणाऱ्या अभिनेत्यांपैकी ते एक. त्यांची सदाबहार व चैतन्यदायी प्रतिमा नव्वदीतही टिकून होती, अशा शब्दात पवार यांनी श्रद्धांजली वाहिली आहे.
- 'रमेश देव दोन पिढ्यांना जोडणारा दुवा'
ज्येष्ठ अभिनेते रमेश देव यांचा परवाच वाढदिवस होता. शुभेच्छांचा ओघ सुरू असतानाच त्यांचे आपल्यातून जाणे दुःखदायक आहे. रमेश देव यांनी मराठी, हिंदी चित्रपटसृष्टीत वेगळी ओळख निर्माण केली. दोन्हीकडे आपल्या अभिनयाची छाप उमटवली. त्यांचे आणि शिवसेनाप्रमुख बाळासाहेब ठाकरे यांचे स्नेहबंध होते. त्यांनी शिवसेनेच्या माध्यमातून राजकारणातही संधी आजमावली होती. चित्रपटसृष्टीत त्यांना आदराचे स्थान होते. देव कुटुंबीयांकडून कला क्षेत्राची अविरत सेवा सुरू आहे. दिवंगत रमेश देव हे कला क्षेत्रात दोन पिढ्यांना जोडणारा महत्त्वाचा आणि मार्गदर्शक असा दुवा होते. त्यांनी सदाबहार आणि मनस्वी कलाकार अशी प्रतिमा आयुष्यभर जपली. त्यांचे चित्रपट क्षेत्रातील योगदान विसरता येणार नाही असे आहे, असे म्हणत मुख्यमंत्र्यांनी रमेश देव यांना श्रद्धांजली वाहिली आहे.
- 'उमदा तारा निखळला'
ज्येष्ठ अभिनेते रमेश देव यांच्या निधनाने मराठी-हिंदी चित्रपटसृष्टीतला उमदा तारा निखळला. कृष्ण-धवल काळापासून हिंदी चित्रपटांमध्येही अमीट ठसा उमवटणाऱ्या अभिनेत्यांपैकी ते एक. त्यांची सदाबहार व चैतन्यदायी प्रतिमा नव्वदीतही टिकून होती. स्व. रमेश देव यांना भावपूर्ण श्रद्धांजली, असे शरद पवार यांनी वाहिलेल्या श्रद्धांजलीत म्हटले आहे.
- 'देव यांच्या निधनाचे वृत्त दु:खद'
मराठी चित्रपट सृष्टीतील ज्येष्ठ अभिनेते रमेश देव यांच्या निधनाचे वृत्त अतिशय दु:खद आहे. त्यांना माझी भावपूर्ण श्रद्धांजली. १८० हून अधिक मराठी व हिंदी चित्रपटांमधून भूमिका साकारलेल्या रमेश देव यांची कारकीर्द अनेकविध अजरामर भूमिकांनी गाजली. भारतीय चित्रपट आणि टेलिव्हिजन सृष्टीतील आघाडीचे अभिनेते म्हणून त्यांचं नाव आदराने घेतले जाते. ईश्वर दिवंगत आत्म्यास शांती देवो व त्यांच्या कुटुंबीयांना या दुःखातून सावरण्याची शक्ती देवो. ॐ शांती., अशा शब्दात केंद्रीय मंत्री नितीन गडकरी यांनी श्रद्धांजली वाहिली आहे.
- 'एक गौरवशाली अध्याय संपला'
ज्येष्ठ अभिनेते रमेश देव यांच्या निधनानं मराठी नाट्य-चित्रपटसृष्टीचा एक गौरवशाली अध्याय संपला आहे. देखणं व्यक्तिमत्त्व, अष्टपैलू अभिनयाच्या बळावर मराठी नाट्य-चित्रपट रसिकांच्या हृदयसिंहासनावर अनेक दशकं अधिराज्य करणारा महान कलावंत काळाच्या पडद्याआड गेला आहे. भावपूर्ण श्रद्धांजली! म्हणत उपमुख्यमंत्री अजित पवार यांनी रमेश देव यांना श्रद्धांजली वाहिली आहे.
- 'मराठी चित्रपटसृष्टीला समृद्ध करणारा अभिनेता'
ज्येष्ठ अभिनेते, निर्माते, दिग्दर्शक रमेश देव यांच्या निधनाचे वृत्त अत्यंत दु:खद आहे. आपल्या दमदार अभिनयाने त्यांनी हिंदी आणि मराठी चित्रपटसृष्टीला समृद्ध केले. त्यांना माझी भावपूर्ण श्रद्धांजली! आम्ही सर्व देव कुटुंबियांच्या दु:खात सहभागी आहोत, अशा शब्दात मंत्री बाळासाहेब थोरात यांनी श्रद्धांजली वाहिली आहे.
- 'चित्रपटसृष्टीत मोठी पोकळी निर्माण झाली'
दिग्गज अभिनेते रमेश देव यांच्या जाण्याने चित्रपटसृष्टीत मोठी पोकळी निर्माण झाली आहे. त्यांच्या आत्म्यास शांती लाभो हीच ईश्वर चरणी प्रार्थना. माझ्यातर्फे व कॉंग्रेस पक्षातर्फे भावपूर्ण श्रद्धांजली. असे काँग्रेस प्रदेशाध्यक्ष नाना पटोले यांनी आपल्या श्रद्धांजलीत म्हटले आहे.
- 'रंगभूमीवर अजरामर भूमिका'
प्रख्यात अभिनेते, निर्माते आणि दिग्दर्शक रमेश देव यांचे निधन झाल्याची बातमी दुःखद आहे. सुमारे २८५ चित्रपटातून त्यांनी भूमिका साकारल्या. याशिवाय रंगभूमीवरही त्यांनी अजरामर भूमिका साकारल्या, अशा शब्दात राष्ट्रवादीच्या खासदार सुप्रिया सुळे यांनी रमेश देव यांना श्रद्धांजली वाहिली आहे. यासह इतरही राजकीय नेत्यांनी अभिनेते रमेश देव यांच्या निधनावर शोक व्यक्त केला आहे.
हेही वाचा - Actor Ramesh Deo Journey : 'या' पक्षाच्या तिकिटावर रमेश देव यांनी लढवली होती लोकसभेची निवडणूक
