मुंबई - अल्पसंख्याक मंत्री नवाब मलिक (Minister Nawab Malik Arrest) यांना 23 फेब्रुवारीला ईडीने अटक केली होती. त्यानंतर पीएमएलए न्यायालयाने मलिकांना 8 दिवसांची ईडी कोठडी (Nawab Malik ED Custody) सुनावली होती. यानंतर राज्यातील राजकीय वातावरण तापले आहे. मलिकांना मनी लाँड्रिंग प्रकरणात ईडी कोठडी सुनावल्यानंतर दुसऱ्याच दिवशी ईडीने मलिक यांचे भाऊ कप्तान मलिक (Kaptan Malik Summons) यांना समन्स बजावले होते. मात्र, त्यांनी ईडीकडून वेळ मागून घेतला असल्याची माहिती सूत्रांकडून मिळाली आहे.
काय आहे प्रकरण?
दाऊद इब्राहिमच्या बहिणीला कुर्ला येथे मालमत्ता बळकावण्यासाठी मदत करणे आणि नंतर ती खरेदी करणे या आरोपाखाली मलिक यांना बुधवारी ईडीकडून अटक करण्यात आली होती. यातील पैसा हवालामार्फत टेरर फंडिंगसाठी वापरण्यात आल्याचा आरोप ईडीने ठेवला आहे. मलिक यांना 3 मार्चपर्यंत ईडीच्या कोठडीत ठेवण्याचे आदेश पीएमएलए न्यायालयाने दिले होते. शुक्रवारी मलिक यांच्या प्रकृतीची तपासणी करण्यासाठी त्यांना जेजे रुग्णालयात नेण्यात आले होते. तेथे त्यांच्या पोटात दुखू लागल्यामुळे जेजेमध्येच ठेवण्याचा सल्‍ला डॉक्टरांनी दिला होता.
नवाब मलिक यांच्या मुलाला ईडीकडून समन्स
दाऊदची बहीण हसीना पारकर हिच्याकडून कुर्ला येथील मालमत्ता मलिक यांनी बेकायदेशीरपणे खरेदी केली. या खरेदीमध्ये त्यांचा मुलगा फराज हा सहभागी होता. कागदपत्रे आणि पैशांची व्यवस्था करण्यात फराजने पुढाकार घेतला होता, असा आरोप ईडीने ठेवला आहे. तसेच मंत्री नवाब मलिक यांचा मुलगा फराज मलिक यांनादेखील ईडीने चौकशीकरिता समन्स बजावला आहे.
नवाब मलिक यांना अटक झाल्यापासूनचा घटनाक्रम-
ईडी 23 फेब्रुवारीला पहाटेच नवाब मलिक यांच्या घरी दाखल झाली होती. त्यानंतर सकाळी सातच्या दरम्यान मलिक यांना ईडी कार्यालयात आणण्यात आले. तब्बल सात तासांच्या चौकशीनंतर नवाब मलिक यांना ईडीने अटक केली. त्यानंतर मलिक यांची जे जे रुग्णालयात वैद्यकीय तपासणी करण्यात आली. त्याचदिवशी रात्री उशिला पीएमएलए न्यायालयाने नवाब मलिक यांना 3 मार्चपर्यंत ईडी कोठडी सुनावली. नंतर मलिक यांच्या पोटात दुखत असल्यामुळे जे जे रुग्णालयात दाखल करण्यात आले होते. आज त्यांना अखेर रुग्णालयातून डिस्चार्ज देण्यात आला असून, आता ते ईडी कोठडीत आहेत.
