मुंबई - नागपाडा येथील सुलतानी-मिश्रा या इमारतीचा काही भाग कोसळून दोन जणांचा मृत्यू झाला. या दुर्घटनेला इमारत मालक आणि या इमारतीला न्यायालयातून स्टे मिळवून देणारे जबाबदार असल्याने त्यांच्यावर सदोष मनुष्य वधाचा गुन्हा दाखल करा, असे निर्देश मुंबईच्या महापौर किशोरी पेडणेकर यांनी संबंधित यंत्रणांना दिले.
महाडमध्ये इमारत कोसळल्याची घटना ताजी असताना आज मुंबईतील नागपाड्यातील सुलतानी-मिश्रा या इमारतीचा काही भाग दुपारी एकच्या सुमारास कोसळला. ही इमारत म्हाडाची सेस इमारत होती. इमारत नव्याने बांधण्यासाठी एनओसी दिली असतानाही ही इमारत खाली करून पाडण्यात आली नव्हती. इमारत धोकादायक झाल्याने त्याचा काही भाग कोसळून दोन जणांचा मृत्यू झाला. आलिया रियासत कुरैशी (वय १२) आणि नूर कुरैशी (वय ७०) अशी मृतकांची नावे आहेत. या इमारत दुर्घटना स्थळाला महापौर किशोरी पेडणेकर यांनी आमदार अमीन पटेल आणि म्हाडाचे अध्यक्ष विनोद घोसाळकर यांच्या उपस्थितीत भेट दिली.
