मुंबई - दहिसरमध्ये गुजरातमधील औषध व्यावसायिकाची गळा चिरून हत्या केल्याची धक्कादायक घटना घडली आहे. याप्रकरणी दहिसर पोलिसांनी मीरा रोड तसेच बिहारमधून दोन आरोपींना अटक करण्यात आली आहे. राहुल रामनाथ शर्मा (१९) तसेच मोहम्मद मकसूद मुमताज शेख ऊर्फ राजू (२८) अशी अटक करण्यात आलेल्या आरोपींची नावे असून मनीष बाबूभाई पटेल (४०) असे हत्या झालेल्या व्यावसायिकाचे नाव आहे.
चोरी करण्याच्या उद्देशाने हत्या -
गेल्या काही दिवसांपूर्वी पटेल एका हॉटेलमध्ये राहत होते. या वेळी त्यांची वॉचमनचे काम करणाऱ्याशी ओळख झाली होती. त्यानंतर पटेल दहिसर (प.), ओमकार अपार्टमेंट , बी विंग, फ्लॅट क्रमांक ३०२ येथे भाड्याने एकटेच राहू लागले. त्या ठिकाणी यातील आरोपी वॉचमन व त्याचा साथीदार पटेल यांच्याकडे येत असत. रविवारीदेखील त्यांनी दारूची पार्टी केली. या वेळी आरोपींना माहीत होते की, पटेल यांच्याकडे भरपूर पैसे आहेत. त्यांच्याकडील पैसे चोरी करण्याच्या उद्देशाने आरोपींनी पटेल यांचा गळा चिरून हत्या केली व दोन्ही आरोपी घटनास्थळावरून फरार झाले, अशी माहिती पोलिसांकडून मिळाली आहे.
हेही वाचा - साखरेचे दर असेच राहिले तर पुढील वर्षी शेतकऱ्यांना विक्रमी रक्कम मिळणार- शेखर गायकवाड
