मुंबई- बालभारतीतर्फे अन्य भाषांप्रमाणे पुढील वर्षापासून ब्रेल लिपीत पाठ्यपुस्तके प्रकाशित करण्यात येणार आहेत. तशी घोषणा आज(मंगळवारी) शालेय शिक्षण, क्रीडा व युवक कल्याणमंत्री अशिष शेलार यांनी वांद्रे येथील कार्यक्रमात केली.
यावेळी संस्थेचे अध्यक्ष अरुण भारस्कर यांनी संस्थेसाठी एक ब्रेल प्रिंटर मिळावा अशी मागणी केली. तीही मान्य करून शेलार यांनी हा प्रिंटर उपलब्ध करून देण्याची ग्वाही दिली. तसेच राज्यात अन्य भाषेतील आणि लिपीतील पाठ्यपुस्तके बालभारतीतर्फे प्रकाशित केली जातात. त्याचप्रमाणे पुढील वर्षापासून ब्रेल लिपीतील पाठ्यपुस्तकेही बालभारतीतर्फे उपलब्ध करून देण्यात येतील. त्याबाबतचा निर्णय नुकताच झालेल्या बालभारतीच्या बोर्डाच्या मिटिंगमध्येही घेण्यात आला आहे व त्याबाबतची पुढील कार्यवाही सुरू झाली आहे. असे सांगत पुढील शैक्षणिक वर्षापासून अंध विद्यार्थ्यांना त्यांची पाठ्यपुस्तके ब्रेल लिपीत उपलब्ध होतील अशी घोषणा शिक्षण मंत्री आशिष शेलार यांनी यावेळी केली.
दरम्यान, संस्थेचे अध्यक्ष अरुण भारस्कर यांनी 'ईटीवी भारतशी बोलताना सांगितले की आम्ही राज्यातील ४० अंध विद्यार्थ्यांच्या शाळांना ब्रेल लिपीत काढण्यात आलेली ही पुस्तके आणि त्यांचा संच मोफत वितरीत करणार आहोत. एका संचाची किंमत साधारणपणे सहा हजार चारशे रुपये इतकी असली तरी ती आम्ही या विद्यार्थ्यांना मोफत देणार असल्याचेही अरुण भारस्कर म्हणाले. संस्थेच्या मानद अध्यक्ष कल्पना पांडे यांनी सांगितले की आमच्या आजच्या प्रयोगामुळे राज्यभरातील सुमारे बाराशे अंध विद्यार्थ्यांना या पुस्तकांचा फायदा होणार असून त्यामुळे त्यांच्या गुणवत्तेतही सुधारणा होईल अशी आम्हाला अपेक्षा आहे.
