मुंबई - सध्या राज्यात राष्ट्रवादी, कॉंग्रेस आणि शिवसेना सत्तेत आहेत. मात्र येणाऱ्या मुंबई महापालिकेमध्ये त्यांची आघाडी कायम राहणार का? यावर प्रश्नचिन्ह निर्माण झाले आहे. भाजपला सत्तेपासून दूर ठेवण्यासाठी महाविकास आघाडीचा जन्म झाला. कॉमन मिनिमम प्रोग्रामच्या आधारावर काम करण्याचा निर्णय घेऊन हे तीन पक्ष सत्तेत आले. मात्र मुंबई महापालिका निवडणुकीसाठी ही आघाडी कायम राहणार का याबाबत शंका व्यक्त केली जात आहे.
राज्यात सत्तेवर येताना महाविकास आघाडी म्हणून आम्ही काम करतोय. तसेच येणाऱ्या महानगरपालिका निवडणुकीत देखील काँग्रेस महाविकास आघाडीसोबत असेल असा विश्वास काँग्रेसचे महाराष्ट्र प्रदेशाध्यक्ष नाना पटोले यांनी व्यक्त केला आहे. मात्र त्यासोबतच महापालिका निवडणुकीचा निर्णय हा स्थानिक कार्यकर्त्यांना विश्वासात घेऊन घेतला जाईल असेही त्यांनी म्हटले आहे. त्यामुळे येणाऱ्या निवडणुकीत काँग्रेस हा आघाडीचा घटकपक्ष म्हणून निवडणूक लढवण्याची शक्यता कमी आहे.
कॉंग्रेस महापालिकेच्या निवडणुका स्वबळावर लढणार?
दरम्यान दुसरीकडे भाई जगताप यांनी देखील मुंबई महापालिकेची निवडणूक कॉंग्रेस स्वतंत्रपणे लढवणार असल्याचे म्हटले होते. त्यामुळे मुंबईसह नाशिक, पुणे, पिंपरी-चिंचवड आणि औरंगाबाद महापालिकेच्या निवडणुकीमध्ये कॉंग्रेस महाविकास आघाडीसोबत असणार का, की स्वबळावर निवडणूक लढवणार हे पाहाणे महत्त्वाचे ठरणार आहे. येणाऱ्या महानगरपालिका निवडणुकीत महाविकास आघाडी म्हणून आम्ही पुढे जाऊ असं वक्तव्य शिवसेनचे खासदार संजय राऊत यांनी केले आहे. मात्र त्याचबरोबर ते असेही म्हटले आहे की, राष्ट्रवादी काँग्रेस आणि शिवसेना हे पक्ष महापालिकेची निवडणूक एकत्र लढवतील, तर कॉंग्रेसला देखील आम्ही सोबत घेण्याचा प्रयत्न करू, यावरून काँग्रेसची आघाडीबाबतची भूमिका तळ्यात मळ्यात असल्याचे दिसून येत आहे.
