मुंबई - बेस्टने मंगळवारपासून प्रवाशांसाठी नवीन भाडे कपात लागू केली आहे. या बेस्ट उपक्रमाच्या निर्णयाचे बोरिवली-दहिसरमध्ये पेढे वाटून स्वागत करण्यात आले.
शिवसेना नेते व युवा सेनाप्रमुख आदित्य ठाकरे यांच्या मागणी नंतर बेस्ट समिती, पालिका सभागृह व राज्य सरकार प्राधिकरणाने या भाडे कपातीस मंजुरी दिली होती. त्यामुळे म्हाडा सभापती विनोद घोसाळकर यांच्या मार्गदर्शनाखाली शिवसेना नगरसेविका तेजस्वी घोसाळकर, मुंबई बँक संचालक अभिषेक घोसाळकर व शिवसैनिकांनी बोरिवली आय. सी. कॉलनी तसेच दहिसर कांदरपाडा भागात फटाक्यांची आतषबाजी करत या निर्णयाचे स्वागत केले.
याप्रसंगी कांदरपाडा येथून सुटणारी बस क्रमांक 245 मधील बेस्ट बसचालक, वाहक व प्रवाशांना गुलाबाचे फुल व पेढे भरवत आनंदोत्सव साजरा करण्यात आला. आज सकाळपासूनच बोरिवली-दहिसर भागात प्रवाशांनी रिक्षाकडे पाठ दाखवत बेस्ट बस थांब्यांवर गर्दी केली होती.
