मुंबई - बॉलीवूडचा सुप्रसिद्ध नृत्यदिग्दर्शक व निर्माता रेमो डिसुजा याच्या अडचणीत वाढ झाली आहे. रेमो डिसुजाने अटकपूर्व जामीन मिळवण्यासाठी मुंबई उच्च न्यायालयामध्ये दाखल केलेली याचिका न्यायालयाने फेटाळली आहे.
उत्तर प्रदेशातील गाजियाबाद येथे एका फसवणुकीच्या प्रकरणामध्ये स्थानिक दंडाधिकारी न्यायालयाने रेमो डिसुजाला समन्स बजावले होते. यासंदर्भात रेमोने मुंबई उच्च न्यायालयात अटकपूर्व जामीन मिळवण्यासाठी याचिका दाखल केली होती. मात्र, आंबोली पोलीस ठाण्यामध्ये कोणत्याही प्रकारचे समन्स बजावण्यात आले नसल्याने न्यायालयाने ही याचिका फेटाळून लावली आहे.
गाजियाबाद येथील दंडाधिकारी न्यायालयाने अद्याप कोणताही समन्स मुंबई पोलिसांकडे पाठवला नसल्याने अटकपूर्व जामिनावर सुनावणी करता येणार नसल्याचे मुंबई उच्च न्यायालयाने नमूद केले आहे.
