मुंबई - राज्यात रेडीरेकनरच्या दरा बद्दल जनतेसोबतच बांधकाम व्यावसायिकाना काहीसा दिलासा मिळावा, यासाठी सरकारकडून त्यावर लवकरच निर्णय घेतला जाणार आहे. अशी माहिती महसूलमंत्री बाळासाहेब थोरात यांनी दिली आहे. याबाबत प्रक्रिया सध्या सुरू असल्याचे त्यांनी सांगितले.
राज्यात रेडीरेकनरमध्ये काही बदल करण्यासाठी एक प्रक्रिया असते. राज्यातील बांधाकम व्यावसायिक आणि नागरीकांकडून मागणी केल्यास त्यासाठी प्रत्येक जिल्ह्याधिकारी बैठका घेत असतात. सध्या या बैठका सुरू आहेत. यासाठी सरकारकडे अनेक निवेदन आलेली आहेत. त्यामुळे या सर्वांचा अभ्यास सुरू असून सरकारकडून त्यावर निर्णय घेतला जाईल असेही मंत्री थोरात यांनी स्पष्ट केले.
हिंगणघाटच्या घटनेसंदर्भात विचारले असता ते म्हणाले की, हिंगणघाटची घटना ही अत्यंत दुर्दैवी आहे. अशा प्रकारची घटना पुन्हा घडू नये असे वाटते आणि त्यासाठीची काळजी घेणेही आवश्यक आहे. यामुळे आम्ही सरकार म्हणून कशा पद्धतीने पुढे जायचे त्यासाठी आजच मंत्रिमंडळ चर्चा करणार असल्याचे त्यांनी स्पष्ट केले. सीएए संदर्भात महाविकास आघाडीची बैठक होणार असून त्यात आम्ही आमची सरकार म्हणून भूमिका स्पष्ट करणार आहोत असेही त्यांनी सांगितले.
