औरंगाबाद - राहुल गांधी का आला माहीत नाही. कुंभकर्णासारखा झोपला होता तेच बरं होतं. राहुल गांधीला प्रेमाचा सल्ला देतो राफेल वर बोलू नको कॉलेजची पोरं टिंगल उडवतात. राफेलवर अधिकृत बोलणारे फक्त मनमोहन सिंह आहेत. त्यांनाच खरं माहीत आहेत. ज्यादिवशी ते बोलले त्यादिवशी मोदींचे कपडे फाटतील, अशी खोचक टीका वंचितचे प्रकाश आंबेडकर यांनी राहूल गांधींवर केली. औरंगाबाद येथे झालेल्या सभेत ते बोलत होते.
निवडणूक महत्वाची आहे, निवडणुकीत चूक झाली तर पुन्हा संधी नाही, मुख्यमंत्री आणि भाजपच्या नेत्यांकडून जी भाषा वापरली जात आहे ती लोकशाहीची नाही तर हुकूमशाहीची भाषा असून ती लोकशाहीत शोभत नाही. अशी टीका प्रकाश आंबेडकर यांनी जाहीर सभेतून केली. तर औरंगाबाद-जालना स्थानिक स्वराज्य संस्था निवडणुका म्हणजेच विधान परिषदेला एमआयएमने कोणाला मत दिले तर शिवसेनेला. त्यामुळे मुस्लिम समाजाला आवाहन करतो आपले राजकारण स्वच्छ करा. ओवेसी चांगला माणूस आहे पण त्यांच्यासोबत असलेला माणूस स्वच्छ नाही. फक्त पूर्व मतदारसंघात गफार कादरी योग्य माणूस आहे त्यामुळे वंचित आघाडीने त्यांना साथ दिली असे प्रकाश आंबेडकर यांनी स्पष्ट करत इम्तियाज जलीलवर निशाना साधला.
पाच वर्षे सत्ता मिळते मात्र कायमची सत्ता मिळाल्याचा भास निर्माण केला जातो. मतांचा अधिकार राजकीय पक्षांना नाही. ज्याचे वय 21 वर्ष आहे तोच इथला राजा ठरवतो. तो दाखवून देईल की आपण राजे नाहीत आम्ही आहोत असे प्रकाश आंबेडकर यांनी म्हटले. गरिबांना गॅस सिलेंडर वाटण्याची योजना तेव्हा पण होती मात्र, कमी प्रमाणात होती. 2020 पर्यंत घर देणार म्हणतात इंदिरा गांधींनी देखील इंदिरा आवास योजना सुरू केली त्यात नवीन काय? रस्त्यातील घोटाळा पाहायचा असेल तर सब काँट्रॅक्टरला विचारा मग कळेल. हे खाताना काँग्रेससारखे निशाणी सोडत नाहीत यांची खाण्याची पद्धत वेगळी आहे. हे दुसऱ्याला खायला सांगतात आणि नंतर कमिशन मागतात. अशी मिश्किल टीका आंबेडकर यांनी केली. मस्तवलेलं सरकार आणि मस्तवलेला मंत्री म्हणाला सिनेमा गृह फुल आहेत मंदी कुठे आहे. नंतर त्याने माफी मागितली. या उधळलेल्या घोड्याला लगाम घालायला हवा. बँकेतील पैसे सुरक्षित ठेवायचे असतील तर वंचितच्या हातात सत्ता द्या, आम्हीच उधळलेल्या घोड्याचा लगाम सांभाळू शकतो असेही आंबेडकर यावेळी म्हणाले.
