अमरावती : अमरावतीच्या लव्ह जिहाद प्रकरणात (Amravati Love Jihad Case) खासदार नवनीत राणा ( MP Navneet Rana) यांच्या विरोधात राजापेठ पोलीस ठाण्यात कलम 353 अंतर्गत गुन्हा दाखल करण्यात (case has been filed ) आला आहे. पोलीस डिपार्टमेंटमधील काही मोजके लोक नेत्यांप्रमाणे वर्दीचा गैरवापर करीत आहेत. चुकीच्या पध्दतीने गुन्हे दाखल केले जात आहेत. मात्र, त्या तरुणीला सहिसलामत आणून तिच्या पालकांच्या स्वाधिन करून मी माझे कर्तव्य पूर्ण केले. ते मी करत राहील, अशा धमक्यांना, केसेसला घाबरणाऱ्यांमधील मी नाही, असा दावा खासदार नवनीत राणा यांनी केला आहे.
नवनीत राणा माध्यमांशी बोलताना म्हणाल्या एका पोलीस पत्नीने आपल्याविरूद्ध पोलीस ठाण्यात जाऊन ठिय्या आंदोलन केले, तक्रारदेखील केली, ते माध्यमांतून समजले. मात्र, त्या पोलीस पत्नीला आपण ओळखत नसून त्या शिवसेनेच्या जिल्हा कार्यकर्त्या असल्याची माहिती त्यांनी माध्यमांना दिली. आपण न्यायाची, हक्काची लढाई लढत आहोत. ज्यांच्यावर अनेक गुन्हे दाखल आहेत, अशांनी आपल्यावर टीका करू नये, असे त्या म्हणाल्या.
अदखलपात्र गुन्ह्यावर नवनीत राणांची प्रतिक्रिया : एका व्यक्तीच्या फिर्यादीवरून खासदार नवनीत राणा यांच्याविरोधात राजापेठ पोलिसांनी अदखलपात्र गुन्ह्याची नोंद केली. त्यावर प्रतिक्रिया देताना म्हणाल्या की कुठल्याही माध्यमातून राणादाम्पत्या विरुद्ध गुन्हे नोंदविले गेले पाहिजे असा काही मंडळींचा इंटरेस्ट आहे, मात्र एखाद्या मुलीला कुणी पळवून नेत असेल तर तिची सोडवणूक करून तिला तिच्या पालकांच्या स्वाधीन करण्याचे कर्तव्य मी पार पाडले आहे.
पोलिसांवरही आरोप : अमरावतीत आंतरधर्मीय विवाहाच्या मुद्द्यावरुन चांगलाच गोंधळ झाला आहे. येथे एका मुलीला पळवून नेण्यात आल्याचा आरोप करण्यात आला होता. त्याप्रकरणी खासदार नवनीत राणा यांनी पोलिसांना थेट पोलीस ठाण्यात जाऊन जाब विचारला. तर भाजप खासदार अनिल बोंडेंही या प्रकरणी आक्रमक झाल्याचे पाहायला मिळाले. त्यांनी या प्रकरणी अनेक सनसनाटी दावे केले. तर पोलिसांवरही निष्काळजीपणाचा आरोप करण्यात आला आहे.
पोलीस आणि कुटुंबीयांचाही रोष : संबंधित मुलगी सातारा येथे सुखरुप मिळाली. मी स्वत:च गेले होते, माझे अपहरण झालेले नव्हते पकडलेल्या मुलाचा माझ्याशी काहीही संबंध नाही असे तिने सांगितले आणि हे प्रकरण शांत झाले दरम्यान माजी पोलीस अधिकाऱ्याने खासदार नवनीत राणा यांच्या या वागणुकीवर आक्षेप नोंदवत पोलीसांशी हुज्जत घातल्या प्रकरणी नवनीत राणा यांनी माफी मागावी, अशी मागणी करत त्यांच्यावर गुन्हा दाखल झाला नाही तर राज्यभर आंदोलन करण्याचा इशारा दिला. तर एका पोलीसाच्या पत्नीने त्याच राजापेठ पोलीस ठाण्यात येऊन पोलीस आणि त्यांच्या कुटुंबीयांना येणाऱ्या अडचणी मांडत नवनीत राणांचा निषेध केला.
