अमरावती - अमरावती जिल्ह्यातील चांदूर रेल्वे ते कुऱ्हा रोड हा अनेक वर्षापासून अतिशय खराब झाला आहे. हा रस्ता जिवघेणा ठरत आहे. त्यामुळे आता आम आदमी पार्टी आक्रमक झाली आहे. गुढीपाडव्यापर्यंत कामाला सुरूवात न झाल्यास सार्वजनिक बांधकाम विभागाचे कार्यालय गुढीपाडव्याला बेशरमच्या पानाफुलांनी सजविणार असल्याचा इशारा आप नेते नितीन गवळी यांनी दिला आहे. याप्रकरणी उपविभागीय अभियंता यांना निवेदन देखील दिले आहे.
चांदूर रेल्वे ते कुऱ्हा रस्त्याची अवस्था दयनीय-
चांदूर रेल्वे ते कुऱ्हा रस्त्याची अवस्था दयनीय झाली आहे. मात्र बांधकाम विभागाकडून अद्यापपर्यंत कोणतेही ठोस पाऊले उचललेले दिसत नाही. सार्वजनिक बांधकाम विभागाकडून चांदूर रेल्वे शहरातील रस्ते चांगले असतांना सुद्धा वेगवेगळे नाव देऊन पुन्हा - पुन्हा रस्ते खराब म्हणून तर रस्ते मजबूत करण्याच्या नावावर गरज नसतांना नवीन रस्ते तयार करण्यात आले. परंतु चांदूर रेल्वे ते कुऱ्हा या रस्त्यावर अनेक अपघात सुद्धा झाले आहे.
आम आदमी पार्टीने नोंदवला निषेध-
मात्र तरीही त्याकडे या विभागाचे दुर्लक्ष होत आहे. त्यामुळे काम न करणाऱ्या विभागाचा आम आदमी पार्टीने निषेध नोंदवला. गुढीपाडव्याच्या अगोदर हे काम सुरू झाले नाही किंवा काम सुरू होण्याची प्रक्रीया प्रगतीपथावर गेली नाही. तर गुढीपाडव्याच्या दिवशी बेशरमच्या पानाफुलांनी सार्वजनिक बांधकाम विभाग, चांदूर रेल्वे कार्यालयाला सजविण्यात येईल, असा इशारा आम आदमी पार्टीचे पश्चिम विदर्भ संघटन मंत्री नितीन गवळी दिला आहे.
हेही वाचा- जळगाव महापालिकेत शिवसेनेची सत्ता; सांगली पॅटर्नचा भाजपला धक्का
