नवी दिल्ली: बँकिंग क्षेत्रातील 100 कोटींहून अधिक रुपयांच्या फसवणुकीच्या घटनांमध्ये लक्षणीय घट ( Decrease in Banking Fraud cases ) झाली आहे. अशा प्रकरणांमध्ये अडकलेली रक्कम 2021-22 मध्ये 41,000 कोटी रुपये होती, जी मागील आर्थिक वर्षात 1.05 लाख कोटी रुपये होती. अधिकृत आकडेवारीत ही माहिती देण्यात आली आहे. 2020-21 मध्ये 265 वरून 2021-22 मध्ये खाजगी आणि सार्वजनिक क्षेत्रातील बँकांमधील फसवणुकीची प्रकरणे 118 पर्यंत कमी झाल्याचे सांगण्यात आले.
सार्वजनिक क्षेत्रातील बँकांमध्ये ( Public sector banks ) 100 कोटींहून अधिक रकमेच्या गैरव्यवहाराच्या प्रकरणांची संख्या 167 वरून 80 वर आली आहे, तर खाजगी क्षेत्रातील बँकांमध्ये अशा प्रकरणांची संख्या 98 वरून 38 वर आली आहे. सार्वजनिक क्षेत्रातील बँकांमधील फसवणूक प्रकरणांमध्ये गुंतलेली रक्कम 2020-21 मध्ये 65,900 कोटी रुपयांवरून 28,000 कोटी रुपयांवर आली आहे. खाजगी क्षेत्रातील बँकांसाठी ही रक्कम 39,900 कोटी रुपयांवरून 13,000 कोटींवर आली आहे.
या वर्षाच्या सुरुवातीला, स्टेट बँक ऑफ इंडिया (SBI) मध्ये 22,842 कोटी रुपयांची सर्वात मोठी बँक फसवणूक झाली, जी ABG शिपयार्ड आणि त्याच्या प्रवर्तकांनी केली होती. ही रक्कम नीरव मोदीने पंजाब नॅशनल बँकेसोबत केलेल्या 14,000 कोटी रुपयांच्या फसवणुकीपेक्षा जास्त आहे. गेल्या महिन्यात, केंद्रीय अन्वेषण ब्यूरो (CBI) ने दिवाण हाऊसिंग फायनान्स लिमिटेडचे माजी अध्यक्ष आणि व्यवस्थापकीय संचालक आणि संचालक धीरज वाधवान आणि इतरांविरुद्ध 34,615 कोटी रुपयांच्या बँक फसवणुकीचा गुन्हा दाखल केला होता.
हेही वाचा - Beware of fraudulent insurance companies : बनावट विमा एजंटच्या कॉलला बळी पडणे कसे टाळावे? घ्या जाणून
