नवी दिल्ली - विनाअनुदानित घरगुती गॅस सिलिंडरची खरेदी करणाऱ्या ग्राहकांच्या खिशाला कात्री लागणार आहे. सरकारी कंपनी इंडियन ऑईलने विनाअनुदानित घरगुती गॅस सिलिंडरची (एलपीजी) किंमत १४४ रुपयांनी वाढविली आहे. हे दर बुधवारपासून लागू होणार आहेत.
एलपीजी सिलिंडरचे दर १ जानेवारी २०२० पासून वाढविण्यात आले नव्हते. इंडियन ऑईलच्या वेबसाईटनुसार दिल्लीत इंडेन गॅसची किंमत ८५८.५० रुपये (१४४.५० रुपयांची दरवाढ) असणार आहे. कोलकात्यात गॅस सिलिंडरची किंमत ८९६. रुपये (१४९ रुपयांची दरवाढ), मुंबईत ८२९.५० (१४५ रुपयांची दरवाढ) रुपये सिलिंडरची किंमत आहे. चेन्नईत १४७ रुपयांनी सिलिंडरची किंमत वाढून ८८१ रुपये झाली आहे.
हेही वाचा-चिकन खाणे सुरक्षित, कोरोनाचा संसर्ग होत नाही- केंद्र सरकार
इंडियन ऑईल ही इंडेन नावाने देशात एलपीजीचे वितरण करणारी सर्वात मोठी कंपनी आहे. सध्या, ग्राहकांना बाजारभावाप्रमाणे सिलिंडरची खरेदी करावी लागते. सरकारकडून दरवर्षी १४.२ किलोच्या १२ सिलिंडरसाठी अनुदान देण्यात येते. ही अनुदानाची रक्कम ग्राहकाच्या बँक खात्यावर जमा करण्यात येते. आंतरराष्ट्रीय बाजारातील खनिज तेलाचे दर आणि विदेशी विनिमय चलनाचा दर याप्रमाणे अनुदानाची रक्कम बदलत असते.
हेही वाचा-'जीएसटी' परतावा मुदतवाढीच्या निकालाला सर्वोच्च न्यायालयाकडून स्थगिती
