पणजी (गोवा) - तुम्ही पूर्ण बहुमताने राज्यात भाजपचे सरकार अस्तित्वात आणा, मी आणि नरेंद्र मोदी राज्याचा दुप्पट वेगाने विकास करतो, असे सांगत केंद्रीय गृहमंत्री अमित शहा यांनी काँग्रेस, तृणमूल आणि आपचा चांगलाच समाचार घेतला. ते आज गोव्यात भाजपा कार्यकर्ता मेळाव्यात बोलत होते.
हेही वाचा - जितेंद्र आव्हाड यांना अटक आणि सुटका; किरीट सोमैया ट्वीटमध्ये म्हणाले...
साठ वर्षांत काँग्रेसने देशाची पूर्ण वाट लावली होती, मात्र मागच्या ७ वर्षांत राज्यात बहुमताच्या जोरावर भाजपने राम मंदिर, कलम ३७०, ट्रिपल तलाक यांसारखे निर्णय संसदेत बहुमताच्या जोरावर घेतले आहेत, त्यामुळे देशाचा विकास झाला आहे. त्याचप्रमाणे राज्याचा विकास करायचा असेल तर, पूर्ण बहुमताच्या जोरावर पुन्हा एकदा भाजपला राज्यात सत्ता द्या, अशी मागणी केंद्रीय गृहमंत्री अमित शहा यांनी गोव्यातील जनतेकडे केली.
मनोहर पर्रीकर आधुनिक गोव्याचे शिल्पकार
माजी दिवंगत मुख्यमंत्री मनोहर पर्रीकर यांच्या कारकिर्दीत राज्याच्या विकासाची मुहूर्तमेढ रोवण्यात आली. त्यांच्यामुळेच राज्याचा विकास होऊन गोव्याची ओळख ही आधुनिक गोवा, अशी झाली आहे. त्यामुळेच, मनोहर पर्रीकर हे आधुनिक गोव्याचे शिल्पकार आहेत, अशा भावना अमित शहा यांनी गोमांतकीयांपुढे व्यक्त केल्या.
शहा यांच्या भाषणातील महत्वाचे मुद्दे
- ६० वर्षांत काँग्रेसला जे शक्य झाले नाही, तो विकास भाजपने मागच्या ७ वर्षांत केला.
- आंतरराष्ट्रीय पातळीवर भारताची ओळख नवा भारत, मोदींचा भारत, अशी झाली आहे.
- देशात बहुमतामुळे अनेक निर्णय घेणे शक्य झाले.
- काँग्रेस काळात सगळेच मंत्री स्वतःला पंतप्रधान समजायचे, फक्त पंतप्रधान मनमोहन सिंग सोडून.
- काँग्रेसच्या मंत्र्यांनी विकास न करता आपल्या पोतड्या भरायचे काम केले.
- कोविड नियंत्रणात मोदी फॅक्टर महत्वाचा ठरला.
- गोवा राज्याने पहिल्या डोसचे १०० टक्के लसीकरण पूर्ण केले आणि दुसरा डोसचा टप्पाही लवकरच पूर्ण होणार.
- भाजप सरकारच्या काळात राज्याला केंद्राकडून आतापर्यंत 21 लाख कोटींची मदत.
- देशातील आंतरराष्ट्रीय चार्टड विमाने १५ ऑक्टोबरपासून सुरू होणार असून त्याचा सर्वात जास्त फायदा गोवा राज्याला होणार आहे.
- विकासाच्या बाबतीत गोव्याचा राज्यात चौथा क्रमांक.
- देशाच्या सुरक्षा थिंक टॅंकला मनोहर पर्रीकर यांचे नाव.
मनोहर पर्रीकर यांनी देशाचे संरक्षण मंत्री असताना सैनिकांसाठी वन रँक वन पेन्शन, सर्जिकल स्ट्राईक, असे महत्वपूर्ण निर्णय घेतले. त्यांच्या काळात संरक्षण क्षेत्रात आमुलाग्र बदल झालेत म्हणून देशाच्या सुरक्षा थिंक टॅंकचे नाव मनोहर पर्रीकर अनुसंधान सुरक्षा केंद्र, असे ठेवणार असल्याची माहिती गृहमंत्री शहा यांनी आपल्या भाषणात दिली.
हे मोदीनॉमिक्स आहे
मोदींच्या विविध निर्णयामुळे राज्यात अर्थव्यवस्था स्थिर झाली. भ्रष्टाचाराला जाणारा पैसा नागरिकांच्या खात्यात वळविला गेला. सामान्य नागरिकांच्या खात्यात थेट पैसा जमा झाल्यामुळे अर्थव्यवस्थेला चालना मिळाली. त्यामुळे, देशात मोदीनॉमिक्स ही संकल्पना अस्तित्वात आली आहे. तसेच, गोवा राज्यात येणारे विविध पक्ष म्हणजे पावसात उगविणारी अळंबी असल्याचे राज्याचे निवडणूक प्रभारी देवेंद्र फडणवीस यांनी सांगितले.
हेही वाचा - काश्मीरमध्ये हस्तक्षेप सुरू राहिला तर पाकिस्तानवर पुन्हा सर्जिकल स्ट्राईक- अमित शाह यांचा इशारा
