श्रीनगर : जम्मू - काश्मीरच्या पुलवामामध्ये दहशतवाद्यांनी पुन्हा एकदा काश्मिरी पंडितावर हल्ला केला आहे. दहशतवाद्यांनी एका बँकेच्या सुरक्षा रक्षकाची गोळ्या झाडून हत्या केली. संजय शर्मा असे त्यांचे नाव आहे. ते काश्मिरी पंडित होते. कलम 370 हटवल्यापासून दहशतवाद्यांनी खोोऱ्यात पुन्हा एकदा टार्गेट किलिंग सुरू केली आहे. त्यांचा मुख्य उद्देश राज्यात दहशत पसरवणे हा आहे, जेणेकरून पंडितांचे येथे परतणे शक्य होणार नाही.
370 हटवल्यानंतर परिस्थिती नॉर्मल : 370 हटवल्यानंतर राज्यातील वातावरण बरेच बदलले आहे. राज्यातील परिस्थिती हळूहळू सामान्य होऊ लागली आहे. येथे येणाऱ्या पर्यटकांची संख्या देखील वाढली आहे. राज्यात गुंतवणुकीचे वारेही वाहू लागले आहे. लोक सिनेमागृहापर्यंत पोहोचू लागले आहेत. अलीकडेच पठाण हा चित्रपट पाहण्यासाठी मोठ्या संख्येने लोक सिनेमागृहात आले होते. पण दहशतवाद्यांसाठी आणि त्यांना आश्रय देणाऱ्यांसाठी ही परिस्थिती पूर्णपणे अस्वस्थ करणारी आहे. पंडितांचे राज्यात पुनरागमन त्यांना नको आहे. यामुळेच ते पंडितांवर हल्ले करत आहेत. आजच्या हल्ल्यापूर्वी यापूर्वी असे अनेक हल्ले झाले आहेत ज्यात काश्मिरी पंडितांना लक्ष्य करण्यात आले आहे. अशाच काही हल्ल्यांवर एक नजर टाकूया.
काश्मिरी पंडित बांधवांवर हल्ला : काश्मिरी पंडित पूरण कृष्ण भट यांची गेल्या वर्षी 15 ऑक्टोबरला दहशतवाद्यांनी गोळ्या झाडून हत्या केली होती. या हत्येची जबाबदारी काश्मिरी फ्रीडम फायटर्स नावाच्या संघटनेने घेतली होती. या घटनेपूर्वी 16 ऑक्टोबर 2022 रोजी दोन काश्मिरी पंडित बांधवांवर दहशतवाद्यांनी हल्ला केला होता. या हल्ल्यात सुनील कुमार भट्ट यांचा मृत्यू झाला, तर त्यांचा भाऊ गंभीर जखमी झाला होता. हे दोघे भाऊ सफरचंदाच्य बागेत काम करण्यासाठी जात असताना त्यांच्यावर हल्ला झाला होता. या घटनेत दहशतवादी आदिल वानी याचा हात होता.
अभिनेत्री अमरीन भटची हत्या : यापूर्वी 25 मे 2022 रोजी आणखी एका घटनेने संपूर्ण देश हादरला होता, तो म्हणजे टीव्ही अभिनेत्री अमरीन भटवर झालेला हल्ला. अमरीन भट यांची त्यांच्या घरी दहशतवाद्यांनी गोळ्या झाडून हत्या केली होती. या घटनेची जबाबदारी टीआरएफ संघटनेने घेतली आहे. या घटनेत अमरीन भट यांचा भाचा जुबेरही जखमी झाला होता, तो फक्त 10 वर्षांचा होता. 12 मे 2022 रोजी दहशतवाद्यांनी काश्मिरी पंडित राहुल भट्ट यांची हत्या केली. राहुल हे बडगाम जिल्ह्यात महसूल अधिकारी होते. दहशतवाद्यांनी त्यांच्या कार्यालयात घुसून त्यांच्यावर हल्ला केला. या हल्ल्याची जबाबदारी लष्कराने घेतली होती. प्रत्युत्तरादाखल पोलिसांनी तीन दहशतवाद्यांना ठार केले होते.
1990 पासून 400 हून अधिक हत्या : 2021 मध्ये श्रीनगरमध्ये माखन लाल नावाच्या व्यक्तीची हत्या करण्यात आली होती. त्यावेळी ते इक्बाल पार्कमध्ये होते. 1990 मध्ये पंडितांना निवडकपणे लक्ष्य केले जात असतानाही श्रीनगर न सोडणाऱ्या काही निवडक व्यक्तींमध्ये माखन लाल यांचा समावेश होता. या हल्ल्याची जबाबदारीही टीआरएफने घेतली होती. मीडिया रिपोर्ट्सनुसार, 1990 पासून दहशतवादी हल्ल्यांमध्ये 400 हून अधिक काश्मिरी पंडित मारले गेले आहेत.
हेही वाचा : Narayanpur Naxal Atatck : छत्तीसगडमध्ये नक्षल्यांचे हल्ले सुरुच, आयईडी स्फोटात हेड कॉन्स्टेबल शहीद
