Puri Jagannath Temple Stampede : पुरीच्या जगन्नाथ मंदिरात चेंगराचेंगरी; २० जखमी, १० बेशुद्ध

Puri Jagannath Temple Stampede : पुरीच्या प्रसिद्ध जगन्नाथ मंदिरात चेंगराचेंगरीची घटना घडली आहे. यामध्ये किमान २० भाविक जखमी झालेत. जखमींवर रुग्णालयात उपचार सुरू आहेत. वाचा पूर्ण बातमी..

पुरी (ओडिशा) Puri Jagannath Temple Stampede : पुरीच्या जगन्नाथ मंदिरात आज (१० नोव्हेंबर) सकाळी चेंगराचेंगरीसारखी परिस्थिती निर्माण झाली. या घटनेत सुमारे २० भाविक जखमी झालेत. यामध्ये महिलांचाही समावेश आहे. जखमींना येथील जिल्हा मुख्यालय रुग्णालयात दाखल करण्यात आलंय.

भाविकांची गर्दी कारणीभूत : श्री जगन्नाथ मंदिर प्रशासन (SJTA) चे मुख्य प्रशासक रंजन कुमार दास यांनी सांगितलं की, शुक्रवारी पहाटे घडलेल्या या घटनेला भाविकांची मोठी गर्दी कारणीभूत होती. पवित्र कार्तिक महिन्यात पुरीच्या जगन्नाथ मंदिरात मोठ्या संख्येनं भाविक दर्शनासाठी येतात. जखमींमध्ये बहुतांश वृद्ध लोक होते. दास म्हणाले की, मंदिरात भाविकांना सुरळीत दर्शन घेता यावं यासाठी आम्ही व्यवस्था वाढवत आहोत.

१० जण बेशुद्ध : मिळालेल्या माहितीनुसार, मंदिरातील मंगल आरतीनंतर ही घटना घडली. जखमी झालेल्या २० भाविकांपैकी १० जण बेशुद्ध झाले आहेत. मंदिराच्या आत भक्तांची गर्दी वाढल्यानंतर चेंगराचेंगरी सारखी परिस्थिती निर्माण झाली. जखमींवर आधी मंदिरातच प्राथमिक उपचार करण्यात आले. त्यानंतर त्यांना पुरीच्या रुग्णालयात हलवण्यात आलं.