पाटणा (बिहार) - भारताचे पुढील राष्ट्रपती कोण होणार? यासाठी 18 जुलै रोजी मतदान होणार आहे. जनतेने निवडून दिलेले लोकप्रतिनिधी या निवडणुकीत सहभागी होतात. अशा परिस्थितीत एनडीएच्या उमेदवार द्रौपदी मुर्मू यांनी बिहारला भेट दिली. पाटण्यात आमदार आणि खासदारांची भेट घेऊन राष्ट्रपतीपदाच्या निवडणुकीत पाठिंबा मागितला. तसेच, बिहार आणि झारखंडशी आपले जुने नाते आहे असा खुलासाही त्यांनी यावेळी केला आहे. मुर्मू यांनी या दौऱ्यात बिहारचे मुख्यमंत्री नितीश कुमार यांचीही भेट घेतली. या भेटीनंतर मुख्यमंत्री नितीश कुमार यांनी मुर्मू या राष्ट्रपती पदाच्या निवडणुकीत प्रचंड मतांनी विजयी होतील असा विश्वास व्यक्त केला आहे.
राष्ट्रपतीपदाची निवडणूक मुर्मू मोठ्या मताधिक्याने जिंकतील - मुख्यमंत्री नितीश यांनी द्रौपदी मुर्मू यांच्याशी संवाद साधला. (Nitish Kumar on Draupadi Murmu) यादरम्यान, मुर्मू यांनी त्यांचा पाठिंबा मागितला. सीएम नितीश यांनी केवळ पाठिंबा जाहीर केला नाही तर प्रचंड मतांनी राष्ट्रपती होण्याचा विश्वासही व्यक्त केला. यावेळी जेडीयूचे राष्ट्रीय अध्यक्ष लालन सिंह उपस्थित होते. पत्रकारांशी बोलताना मुख्यमंत्री म्हणाले की, बिहार आणि झारखंड या दोन्ही राज्यांसाठी ही आनंदाची बाब आहे. राष्ट्रपतीपदाची निवडणूक मुर्मू मोठ्या मताधिक्याने जिंकतील याची आम्हाला खात्री आहे.
भगवान बिरसा मुंडा यांच्या पुतळ्याला पुष्पहार अर्पण - याआधी एनडीएच्या राष्ट्रपतीपदाच्या उमेदवार द्रौपदी मुर्मू विशेष विमानाने पाटण्याला पोहोचल्या होत्या. जेथे एनडीएच्या नेत्यांनी त्यांचे भव्य स्वागत केले. पाटणा विमानतळावर त्यांचे स्वागत करण्यासाठी एनडीएतील अनेक नेते उपस्थित होते. जीतन राम मांझी, पशुपती कुमार पारस आणि जेडीयूचे प्रदेशाध्यक्ष उमेश कुशवाह हेही त्यांचे स्वागत करण्यासाठी पोहोचले. यानंतर त्या थेट हार्डिंग रोडवर गेल्या, जिथे त्यांनी भगवान बिरसा मुंडा यांच्या पुतळ्याला पुष्पहार अर्पण केला.
हे राष्ट्रीय जनता दलाला आवडणार नाही - एनडीएच्या नेत्यांनीही राष्ट्रीय जनता दलाला द्रौपदी मुर्मूला पाठिंबा देण्याचे आवाहन केले. याबाबत आरजेडीचे प्रदेशाध्यक्ष जगदानंद सिंह यांनी मोठे वक्तव्य केले आहे. ते म्हणाले की, आपण सुरुवातीपासूनच दलित आदिवासींची लढाई लढत आहोत. इथे दोन विचारप्रवाहांची लढाई आहे, व्यक्तीची लढाई नाही. राष्ट्रपती हे देशाचे सर्वोच्च पद आहे आणि जो पक्ष संविधानाशी खेळत आहे, राष्ट्रीय चिन्हांशी खेळतो आहे, त्याचा उमेदवार या निवडणुकीत जिंकतो, हे राष्ट्रीय जनता दलाला आवडणार नाही, असे जगदानंद सिंह यांनी स्पष्टपणे सांगितले.
एकूण 81687 मते - उपमुख्यमंत्री तारकिशोर प्रसाद, रेणू देवी, विधानसभा अध्यक्ष विजय सिन्हा, भाजप प्रदेशाध्यक्ष डॉ. संजय जयस्वाल यांच्यासह अनेक बडे नेते विमानतळावर उपस्थित होते. बदललेल्या परिस्थितीत नितीशकुमारांची राजकीय महत्त्वाकांक्षाही जागृत झाली आहे. नितीशकुमार यांनीही प्रत्यक्ष वा अप्रत्यक्षपणे राष्ट्रपती आणि उपराष्ट्रपतीपदासाठी दावा केला होता. केवळ निवडून आलेले प्रतिनिधीच राष्ट्रपती निवडणुकीत मतदान करू शकतात. विधान परिषदेच्या सदस्यांना मतदानाचा अधिकार नाही. लोकप्रतिनिधींच्या मतांचे मूल्य लोकसंख्येनुसार ठरवले जाते. बिहारमध्ये राज्यसभा, लोकसभा आणि विधानसभेची एकूण 81687 मते आहेत.
बिहारमध्ये भाजपकडे 28189 मते - सध्याच्या परिस्थितीत राष्ट्रीय लोकशाही आघाडीकडे 54540 मते आहेत. तर, विरोधकांकडे 25024 मते आहेत. नितीश कुमार यांनी भाजप उमेदवाराच्या बाजूने मत दिल्यास राष्ट्रीय लोकशाही आघाडीला बिहारमधून एकूण 29515 मतांची आघाडी मिळू शकते (Bihar connection to the presidential election). बिहारमध्ये भाजपला 28189, जेडीयूकडे 21945, आरजेडीकडे 15980, काँग्रेसला 4703 आणि एमएलकडे 2076 मते आहेत.
हेही वाचा - जीवन धन्य करणारा संत ज्ञानेश्वर महाराज पालखी सोहळा; जाणून घेऊया इतिहास
