हैदराबाद - अल्पवयीन मुलीवर झालेल्या सामूहिक बलात्काराच्या घटनेचा पोलीस सातत्याने तपास करत आहेत. पोलिसांनी अनेक महत्त्वाचे पुरावे जमा केले आहेत. पीडितेचा जबाब पुन्हा घेण्यात आला आहे. या संपूर्ण प्रकरणात आमदाराच्या मुलाच्या सहभागावर पोलिसांनी कोणतीही प्रतिक्रिया दिलेली नाही. मात्र, त्याला अटकही होऊ शकते, असे सूत्रांचे म्हणणे आहे. या प्रकरणी आतापर्यंत पाच आरोपींना अटक करण्यात आली असून त्याती तिघे अल्पवयीन आहेत.
दरम्यान, राज्य महिला आयोगाने या संपूर्ण प्रकरणाची स्वत:हून दखल घेतली आहे. आयोगाने डीजीपींकडून या प्रकरणाचा अहवाल मागवला आहे. अल्पवयीन मुलीवर झालेल्या सामूहिक बलात्कार प्रकरणातील पाचही आरोपींना पोलिसांनी अटक केली आहे. फॉरेन्सिक पथकाला कारमधूनही काही पुरावेही मिळाल्याचे बोलले जात आहे. या प्रकरणाचा तपास बंजारा हिल्सचे सहायक पोलीस आयुक्त सुदर्शन हे करत आहेत. रविवारी संध्याकाळी फॉरेन्सिक तज्ज्ञांच्या पथकाने इनोव्हा आणि बेंझची कसून तपासणी केली. अहवालानुसार, बेंझ कारमध्ये पीडितेचे काही साहित्य सापडले असून त्यात कर्णफुल, बुट आणि केसांचा समावेश आहे. मात्र, तपासणीत सापडलेल्या पुराव्यांबाबत पोलिसांनी अधिकृत दुजोरा दिलेला नाही.
या घटनेबाबत भाजप आमदार रघुनंदन राव म्हणाले की, या प्रकरणात एआयएमआयएम पक्षाच्या आमदाराचा मुलगा सहभागी आहे. यासंदर्भात त्यांनी काही पुरावेही माध्यमांसमोर ठेवले. पोलीस आणि न्यायालयाकडे सुपूर्द करण्यासाठी आपल्याकडे आणखी पुरावे असल्याचे त्यांनी सांगितले. काँग्रेसचे विधिमंडळ ( सीएलपी ) पक्षनेते मल्लू भट्टी विक्रमार्क यांनी पबमध्ये विविध नियमांचे उल्लंघन होत असल्याची सरकारवर टीका केली आहे. महिलांवर अत्याचार होत असतानाही कारवाई होत नसल्याचे त्यांनी सांगितले. अल्पवयीन मुलीवर बलात्कार झाला तर आरोपींवर कारवाई करण्यास दिरंगाई का करत आहेत. या प्रकरणातील दोषींना शिक्षा देण्याची मागणी भट्टी विक्रमार्का यांनी सरकारकडे केली. या घटनेच्या निषेधार्थ जनसेना पक्षाने जुबली हिल्स पोलीस ठाण्याबाहेर निदर्शने केली. दरम्यान त्यांनी पोलीस ठाण्यात घुसण्याचा प्रयत्न केला. दोषींना कठोर शिक्षा व्हावी, अशी मागणी पक्षाच्या नेत्यांनी केली. या प्रकरणात ज्येष्ठांच्या मुलांचा सहभाग असल्याची बाब समोर आली आहे, असा आरोप त्यांनी केला.
हेही वाचा - Video : नियंत्रण सुटल्याने चारचाकीने तीन दुचाकींना उडवले, दुचाकीस्वाराचा मृत्यू
