पाटणा - बिहारमध्ये मुख्यमंत्री नितीश कुमार यांच्या नेतृत्वाखाली एनडीएचे सरकार स्थापन झाले आहे. निवडणुकीत जास्त जागा जिंकूनही भाजपाने जदयूचे प्रमुख नितीश कुमार यांना मुख्यमंत्री केल्यानंतर आश्चर्य व्यक्त करण्यात आले. यातच नितीश कुमार यांना भाजपाने तात्पुरते मुख्यमंत्री केल्याचा दावा राष्ट्रीय जनता दलाचे नेते मनोज झा यांनी केला आहे. भाजपाने आपल्या आमदारांना पुढील 3 ते 4 महिने शांत राहण्यास सांगितले असून भाजपा बिहारमध्ये ऑपरेशन लोटस रावबणार आहे. मात्र, हे ऑपरेशन कर्नाटक किंवा मध्यप्रदेशपेक्षा वेगळे असेल, असे झा यांनी सांगितले.
बिहारमध्ये, मध्यप्रदेश/कर्नाटकपेक्षा थोडे वेगळे ऑपरेशन लोटस चालवण्यात येणार आहे. भाजपाने आपल्या आमदारांना 4 महिन्यांसाठी शांत राहण्यास सांगितले आहे. ज्यांना अस्थायी स्वरुपात पद मिळाले आहे, हे त्यांच्याही लक्षात येत आहे, असे टि्वट मनोज झा यांनी केले आहे. नितीश कुमार यांनी मोठी चूक केली आहे. मात्र, जनादेश लक्षात घेऊन जर ते पश्चताप करण्यास तयार असतील. तर त्यांच्यासाठी इतर दरवाजे खुले आहेत, असे मनोज झा ईटीव्ही भारतच्या प्रतिनिधीशी बोलताना म्हणाले.
सातव्यांदा मुख्यमंत्रीपदाची शपथ -
बिहारमध्ये नितीश कुमार यांनी सातव्यांदा मुख्यमंत्रीपदाची शपथ घेतली. राज्यपाल फागू चौहान यांनी बिहारचे 37 वे मुख्यमंत्री म्हणून नितीश कुमार यांना पद आणि गोपनीयतेची शपथ दिली. तर भारतीय जनता पक्षाचे नेते तारकिशोर प्रसाद आणि रेणूदेवी यांनी बिहारचे उपमुख्यमंत्री म्हणून शपथ घेतली. 10 नोव्हेंबरला बिहार विधानसभा निवडणुकीचा निकाल समोर आला. राष्ट्रीय लोकशाही आघाडीला (एनडीए)125 जागा मिळाल्या. त्यापैकी 74 जागा भाजपाच्या खात्यात गेल्या. राष्ट्रीय जनता दलाने तेजस्वी यादव यांच्या नेतृत्वात महागठबंधनने नितीश यांच्या विरोधात 110 जागांवर विजय मिळविला.
हेही वाचा - बराक ओबामा यांच्याविरोधात उत्तरप्रदेशमध्ये तक्रार दाखल; सुनावणी 1 डिसेंबरला
