ऑलिम्पिक गोल्डन बॉय नीरज चोप्राचा ( Neeraj Chopra ) जागतिक अॅथलेटिक्स चॅम्पियनशिपच्या ( World Championship ) अंतिम फेरीत ग्रेनेडाच्या अँडरसन पीटर्सशी सामना झाला. यामध्ये नीरजने 88.13 मीटर भालाफेक करून रौप्य पदक ( Silver Medal ) मिळविले, तर पीटर्सने 90 मीटरपेक्षा लांब भालाफेक करत सुवर्णपदक प्राप्त केले. या कामगिरीनंतर नीरजने देशवासियांचे आभार मानत देशासाठी पदक जिंकणे ही अभिमानाची बाब असल्याचे म्हटले आहे.
अँडरसन पीटर्सने 90.54 मीटर अंतर भाला फेकला. त्याचवेळी, हेवर्ड फील्ड येथे झालेल्या अंतिम फेरीत चोप्राने 88.13 मीटर अंतरावर भालाफेक केली. टोकियो 2020 चा रौप्यपदक विजेता जेकब वडलेजने 88.09 मीटर अंतर भालाफेक करीत कांस्यपदक जिंकले.
काय म्हणाला नीरज चोप्रा - भारतासाठी जिंकणे ही माझ्यासाठी अभिमानाची गोष्ट आहे, असे नीरजने पदक जिंकल्यानंतर म्हटले आहे. आपल्यावर अभिनंदनाचा वर्षाव करणाऱ्या देशवासियांचे त्याने आभार मानले आहेत. पुढील वर्षी पुन्हा जागतिक स्पर्धा होणार आहे. त्यावेळी मी यापेक्षा अधिक चांगली कामगिरी करील. नीरज चोप्राच्या या कामगिरीने देशभरात आनंदाचे वातावरण निर्माण झाले आहे. पंतप्रधान नरेंद्र मोदी यांनी त्याचे अभिनंदन केले आहे. देशभरातून त्याच्यावर अभिनंदनाचा वर्षाव होत आहे.
