अमरावती : आंध्र प्रदेशच्या तिरुपतीमध्ये एका व्यक्तीसोबत अजब प्रकार घडला आहे. कोर्लागुंटा येथे राहणारा हा व्यक्ती, बेवारस कोरोना मृतांना माती द्यायला गेला होता. यावेळी त्याच्यासमोर त्याच्याच आईचा मृतदेह आला. यामुळे स्थानिक रुग्णालय प्रशासनाचा ढिसाळ कारभार चव्हाट्यावर आला आहे.
कुटुंबातील सर्वांना झाली होती कोरोनाची लागण..
मिळालेल्या माहितीनुसार, लक्ष्मी देवी (६२), त्यांचा मुलगा सुरेंद्र आणि सून या तिघांना कोरोनाची लागण झाली होती. त्यानंतर लक्ष्मी यांना स्थानिक मॅटर्निटी रुग्णालयात दाखल करण्यात आले होते. तर सुरेंद्र आणि त्याच्या पत्नीवर खासगी रुग्णालयात उपचार सुरू होते. मात्र, रुग्णालयातील खर्च परवडत नसल्यामुळे हे दाम्पत्य दोन दिवसांमध्येच घरी परतले. त्यांना घरीच क्वारंटाईन करण्यात आले होते. शिवाय लक्ष्मी देवी यांच्याकडे मोबाईल नसल्यामुळे सुरेंद्रला आपल्या आईची तब्येत कशी आहे हेदेखील माहित पडत नव्हते.
कोरोनातून बरा झाल्यानंतर २९ मे रोजी सुरेंद्र मॅटर्निटी रुग्णालयात गेला. तिथे वॉर्ड व्हॉलेंटिअर आणि प्रांत अधिकाऱ्यांनी त्यांना त्यांच्या आईचा १९ मे रोजीच मृत्यू झाल्याचे सांगितले. तेव्हा त्यांच्या आईला बेवारस समजून एका स्वयंसेवी संस्थेला त्यांचा मृतदेह देण्यात आला होता, असेही सुरेंद्रला सांगितले.
अशा प्रकारे समोर आला आईचा मृतदेह..
त्यानंतर सुरेंद्र घरी निघून आला. रविवारी तो मामंदूर वनक्षेत्राच्या परिसरात गेला होता. याठिकाणीच सर्व बेवारस मृतदेहांचे दफन केले जाते. त्यामुळे तो आपल्या आईला श्रद्धांजली वाहण्यासाठी तिथे पोहोचला होता. यावेळी तिथे मुस्लिम जेएसी या सामाजिक संस्थेचे सदस्य १६ बेवारस मृतदेहांना दफन करण्यासाठी आले होते. यावेळी स्थानिक आमदार करुणाकर रेड्डी, आणि प्रांत अधिकारीही तिथे उपस्थित होते.
प्रांत अधिकाऱ्याने सुरेंद्रला पाहताच ओळखले, आणि पुन्हा एकदा मृतदेहांना पाहण्यास सांगितले. यावेळी या मृतदेहांमध्ये सुरेंद्रला आपल्या आईचा मृतदेह मिळाला, आणि ते तिथेच रडू लागले. यावेळी उपस्थित सर्वांनी त्यांना आधार दिला, आणि त्यांच्या उपस्थितीमध्ये त्यांच्या आईचा अंत्यसंस्कार पार पाडला.
हेही वाचा : सुएझ कालव्यात अडकले होते 'द एव्हर गिव्हन'; मालकाकडे 550 दशलक्ष अमेरिकन डॉलर्सची ईजिप्तकडून मागणी
