उत्तर प्रदेश : कुशीनगर जिल्हा रुग्णालयाच्या आपत्कालीन वॉर्डमध्ये एक भटका कुत्रा जखमी व्यक्तीचे रक्त चाटत असल्याचे एका व्हायरल व्हिडिओनंतर सहा आरोग्य कर्मचाऱ्यांना कामावरून काढून टाकण्यात आले ( Hospital Six Health Workers Terminated ) आहे. कुशीनगरचे जिल्हा न्यायदंडाधिकारी एस. राज लिंगम यांनी पदमुक्तीचे आदेश जारी केले. त्यांनी मुख्य वैद्यकीय अधीक्षक आणि दोन वैद्यकीय अधिकाऱ्यांकडून स्पष्टीकरण मागितले आहे.
कुत्रा रक्त चाटताना दिसत आहे : जिल्हा दंडाधिकाऱ्यांनी एडीएम दर्जाच्या अधिकाऱ्याला घटनेची पडताळणी करण्याचे आदेश दिले आहेत आणि अहवाल आल्यानंतर कारवाई सुरू केली आहे. उपमुख्यमंत्री ब्रजेश पाठक, जे राज्याचे आरोग्य मंत्री देखील आहेत, यांनी या गंभीर त्रुटीच्या चौकशीचे आदेश दिले आहेत. आरोग्य विभागाच्या अधिकार्‍यांनी सांगितले की, बिट्टू नावाचा २५ वर्षीय तरुण 1 नोव्हेंबरच्या रात्री कुशीनगरच्या जाठन पोलीस ठाण्यांतर्गत एका गावाजवळ एका रस्ता अपघातात जखमी झाला होता. त्याला हॉस्पिटलच्या इमर्जन्सी वॉर्डमध्ये दाखल करण्यात आले. व्हायरल झालेल्या व्हिडिओमध्ये एक भटका कुत्रा त्याच्या जखमेतून रक्त चाटताना दिसत आहे.
व्हिडिओ सोशल मीडियावर अपलोड : या घटनेने जिल्ह्याची प्रतिमा डागाळली आणि त्यामुळेच सहा आरोग्य कर्मचाऱ्यांच्या सेवा बंद करण्यात आल्या, असे जिल्हा दंडाधिकारी म्हणाले. मुख्य वैद्यकीय अधीक्षक डॉ. एस.के. राय म्हणाले की, कर्तव्यावर असलेले कर्मचारी बोलत असताना रुग्ण बेडवरून खाली पडला होता. दरम्यान, एक भटका कुत्रा हॉस्पिटलच्या इमर्जन्सीमध्ये घुसला आणि कोणीतरी या संपूर्ण घटनेचा व्हिडिओ बनवला आणि तो सोशल मीडियावर अपलोड केला.
