Uniform Civil Code : समान नागरी कायद्याला विरोध करणाऱ्यांची मानसिकता महिलांना गुलाम बनविण्याची - भाजप खासदार हरनाथ सिंह

भाजपच्या दोन खासदारांनी शुक्रवारी संसदेत समान नागरी संहितेचा मुद्दा (uniform civil code) उपस्थित केला. त्यावर विरोधी पक्षांनी जोरदार गदारोळ केला. या दोन खासदारांपैकी एक भाजप खासदार हरनाथ सिंह यांनी शून्य प्रहरात या मुद्द्यावर नोटीस दिली होती. या मुद्द्यावर त्यांनी ईटीव्ही भारतच्या वरिष्ठ प्रतिनिधी अनामिका रत्ना यांच्याशी संवाद साधला. (BJP MP Harnath Singh on Uniform Civil Code).

नवी दिल्ली : 2014 पासून देशात सत्तेत असलेल्या भारतीय जनता पक्ष एक-एक करत आपले सर्व वादे पूर्ण करत आहे. आता पक्षाची नजर 2023 मधील विविध विधानसभा आणि 2024 च्या लोकसभा निवडणुकांवर आहे. आता समान नागरी संहिता आणि लोकसंख्या नियंत्रण कायदा हे असे मुद्दे आहेत ज्यावर पक्षाचे लक्ष आहे. या मुद्यावर भाजप खासदार हरनाथ सिंह (BJP MP Harnath Singh) म्हणाले की, "जनसंघाच्या काळापासून समान नागरी कायदा हा आमचा मुद्दा आहे. हा आमचा निवडणुकीचा अजेंडा नाही. कोणत्याही समाजातील महिलांमध्ये धर्म, लिंग, संप्रदाय आणि भाषेच्या आधारावर भेदभाव केला जाऊ नये, हा आमचा मुद्दा पूर्वीपासून आहे. परंतु काही लोकांनी याला धर्माशी जोडले आहे". (BJP MP Harnath Singh on Uniform Civil Code).

भाजपला सर्व महिलांना समान अधिकार द्यायचे आहेत : हरनाथ सिंह म्हणाले की, "हिंदू धर्मात सुनेला सन्मानाने जगण्याचा अधिकार आहे. तसाच अधिकार सर्व धर्मातील महिलांना मिळावा, अशी आमची इच्छा आहे. यामध्ये आम्ही पोटगी, पालकत्व आणि निपुत्रिक दाम्पत्याला मुले दत्तक घेण्यासारख्या हक्काबाबत बोलतो आहे. यात गैर काय?". ते पुढे म्हणाले की, "काही पक्ष आणि मौलाना कुरबुरी करत आहेत. त्यांना त्यांच्या समाजातील महिलांना पुढे जाऊ द्यायचे नाही. मात्र भाजपला घटनेनुसार सर्व महिलांना समान अधिकार द्यायचे आहेत. पण अनेक पक्षांनी शुक्रवारी ज्या प्रकारे आंदोलन केले ते आश्चर्यकारक आणि हास्यास्पद आहे."

भाजप व्होट बँकेचे राजकारण करत नाही : हरनाथ सिंह म्हणाले की, "भाजप वोट बँकेचे राजकारण करत नाही. आम्ही सर्व धर्मातील महिलांच्या सक्षमीकरणाबद्दल बोलत आहोत. जर निपुत्रिक व्यक्ती मूल दत्तक घेण्याबद्दल बोलत असेल किंवा स्त्री पोटगीची मागणी करत असेल तर त्यात धर्म कुठून आला? विरोध करणारे महिलांना गुलाम बनवण्याचा विचार करतात. एकसमान नागरी संहितेवर अनेक राज्ये पुढे सरसावलेली आहेत. अनेकांनी त्यावर समित्या स्थापन केल्या आहेत. हा मुद्दा राष्ट्रीय स्तरावर मांडणे गरजेचे असून त्यासाठी कायदा करण्याची गरज आहे".

श्रीकृष्णजन्मभूमीवर श्रीकृष्णाचे मंदिर बांधले पाहिजे : 2024 च्या अजेंड्यावर बोलताना हरनाथ सिंह म्हणाले की, "आम्ही याला अजेंडा मानत नाही. भाजप सर्वांना समृद्ध बनवण्याचा आणि देशाचे सार्वभौमत्व सुरक्षित ठेवण्याचा प्रयत्न करतो". 2024 मध्ये कृष्णजन्मभूमीचा मुद्दाही मोठा असेल का? या प्रश्नावर ते म्हणाले की, "प्रथम हे स्पष्ट झाले पाहिजे की हा भगवान राम किंवा श्रीकृष्ण जन्मभूमीशी संबंधित मुद्दा आहे की परदेशी आक्रमकांनी बेकायदेशीरपणे कब्जा केलेल्या भूमीचा आहे. श्रीकृष्णजन्मभूमीचाही प्रश्न असाच आहे. साहजिकच येथे श्रीकृष्णाचे मंदिर बांधले पाहिजे".