नवी दिल्ली - आज देशातील अनेक शहरे प्लास्टिकच्या विळख्यात अडकली आहे. प्लास्टिक हे पर्यावरणासाठी घातक असून, आपण मोठ्या प्रमाणात प्लास्टिकचा वापर करत आहोत. प्लास्टिकच्या पिशव्यांचा अनावश्यक वापर करून मानवी आरोग्याशी खेळले जात आहे. आज 'आंतरराष्ट्रीय प्लास्टिक पिशवी मुक्त दिवस' आहे. हा दिवस प्लास्टिकसंदर्भात लोकांमध्ये जनजागृती करण्यासाठी जाहीर करण्यात आला होता. परंतु आज वाढत्या प्रदूषणाबद्दल आपण किती जागरूक आहोत हा प्रश्न कायम आहे.
प्लास्टिकमुळे होणारे नुकसान, त्याचा वाढता वापर आणि दुष्परिणामांविषयी लोकांमध्य जागरूकता निर्माण करण्यासाठी 'आंतरराष्ट्रीय प्लॅस्टिक बॅग फ्री डे' 3 जुलै 2009 पासून संपूर्ण जगात साजरा करण्यात येत आहे. आजही मोठ्या बाजारांपासून ते भाजी मार्केटपर्यंत वस्तू प्लास्टिकमध्ये उघडपणे विकल्या जात आहेत. दिवसेंदिवस समुद्रात वाढत्या प्लास्टिक प्रदूषणामुळे समुद्री प्राण्यांच्या जीवालाही धोका निर्माण झाला आहे.
भारताचे पंतप्रधान नरेंद्र मोदी यांनी 2022 पर्यंत देशाला सिंगल युज प्लास्टिक मुक्त करण्याची घोषणा केली होती. सध्या संपूर्ण देशात सिंगल युज प्लास्टिकच्या वापरावर बंदी घालण्यात आली आहे. मात्र, त्याची प्रभावी अंमलबजावणी होण्यास अडचणी येत आहेत. प्लास्टिक पिशव्यांवर घातलेल्या बंदीनंतर प्लास्टिकची अवैध वाहतूक आणि काळा बाजार या सारखे प्रकार समोर आले आहेत.
‘प्लास्टिकची पिशवी मागू नका’ अशी पाटी लिहिलेल्या दुकानातही दुकानदार पिशव्या ठेवतात. तर ग्राहकही त्यांच्याकडे पिशव्या मागतात. त्यामुळे प्लास्टिकचा वापर न करण्याची सुरुवात प्रत्येकाने स्वत:पासून सुरू करायला हवी. घराबाहेर पडताना पिशवी घेऊनच बाहेर पडावे. प्लास्टिकची पिशवी मागू नका. तरच प्लास्टिकचा वापर कमी होऊ शकेल आणि निसर्गाचे जतन होईल.
