लखनऊ (उत्तर प्रदेश) - उत्तर प्रदेश सरकारच्या सूचनेनुसार आतापर्यंत धार्मिक स्थळांवरून 11 हजार 'बेकायदेशीर' लावलेले लाऊडस्पीकर हटवण्यात आले असून 35,000 लाऊडस्पीकरचा आवाज कमी करण्यात आला आहे अशी माहिती अतिरिक्त पोलीस महासंचालक (कायदा व सुव्यवस्था) प्रशांत कुमार यांनी दिली आहे. (Yogi Govt Removed Illegal Bhonga) धार्मिक स्थळांवर बेकायदेशीरपणे लावलेले लाऊडस्पीकर काढून टाकण्यासाठी आणि कायदेशीर लाऊडस्पीकरचा आवाज कमी करण्यासाठी राज्यभर मोहीम राबवली जात आहे. याअंतर्गत बुधवारी (दि. 27 एप्रिल)रोजी दुपारपर्यंत 10923 लाऊडस्पीकर काढण्यात आले असून 35,221 लाऊडस्पीकरचा आवाज मर्यादेपर्यंत कमी करण्यात आला आहे अशी माहितीही त्यांनी दिली आहे.
या कारवाईबाबत माहिती देताना कुमार म्हणाले, "काढले जाणारे लाऊडस्पीकर अनधिकृत आहेत. जे लाऊडस्पीकर जिल्हा प्रशासनाची रीतसर परवानगी न घेता बसवले गेले आहेत किंवा परवानगी दिलेल्या संख्येपेक्षा जास्त लावले गेले आहेत त्यांना 'अनधिकृत' श्रेणीत वर्गीकृत करण्यात आले आहे. (Yogi government On Bhonga) लाऊडस्पीकरबाबत उच्च न्यायालयाचे आदेशही विचारात घेतले जात असल्याचेही त्यांनी सांगितले आहे.
मुख्यमंत्री योगी आदित्यनाथ यांनी गेल्या आठवड्यात वरिष्ठ अधिकाऱ्यांसोबत कायदा आणि सुव्यवस्था आढावा बैठकीत दिलेल्या मार्गदर्शक तत्त्वांच्या आधारे ही कारवाई करण्यात येत आहे. मुख्यमंत्री योगी म्हणाले होते, की प्रत्येकाला त्यांच्या धार्मिक विश्वासानुसार पूजा आणि प्रार्थना करण्याचे स्वातंत्र्य आहे, परंतु लाऊडस्पीकरचा आवाज परिसराबाहेर जाऊ नये जेणेकरून इतर लोकांना कोणतीही अडचण येईल. त्यानंतर हा निर्णय घेण्यात आला.
राज्याच्या गृह विभागाने ३० एप्रिल पर्यंत 'बेकायदेशीरपणे' लावलेले लाऊडस्पीकर काढण्यासाठी केलेल्या कारवाईचा रिपोर्ट मागवला आहे. बुधवारी पोलीस विभागाने दिलेल्या माहितीनुसार, लखनौ झोनमधील जिल्ह्यांमध्ये सर्वाधिक 2,395 लाऊडस्पीकर काढून टाकण्यात आले आहेत. त्यानंतर गोरखपूर (1,788), वाराणसी (1,366) आणि मेरठ (1204) झोन आहेत. लाऊडस्पीकर मर्यादित करण्याच्या बाबतीत, लखनौ प्रदेश 7,397 लाउडस्पीकरवर कारवाई करून पहिल्या क्रमांकावर आहे, त्यानंतर बरेली (6,257) आणि मेरठ (5,976) आहे.
अतिरिक्त पोलीस महासंचालक (Law and order) प्रशांत कुमार म्हणाले की, लाऊडस्पीकर हटवण्याचे काम कोणताही भेदभाव न करता केले जात आहे. पोलीस उपायुक्त (पश्चिम) सोमेन बर्मा म्हणाले, बेकायदेशीर लाऊडस्पीकर काढण्याची प्रक्रिया मंगळवारी सुरू झाली होती आणि ती अजूनही सुरू आहे. विविध धार्मिक नेते आणि शांतता समित्यांचे सदस्य यांच्या समन्वयाने आम्ही ही मोहीम पुढे नेत आहोत. आजपर्यंत आम्हाला कोणत्याही प्रकारचा विरोध झाला नाही असही ते म्हणाले आहेत.
हेही वाचा - Raj Thackeray's Tweet : महाराष्ट्रात 'योगी' कुणीच नाही, आहेत ते फक्त सत्तेचे 'भोगी'- राज ठाकरे
