भोपाळ : मध्य प्रदेशच्या ग्वाल्हेरमध्ये कोरोना लसीकरणामध्ये गोंधळ होत असल्याचे समोर आले आहे. याठिकाणी कोरोना लसीकरणासाठी एकाच फोन नंबरने तब्बल ९४० जणांच्या नावाची नोंदणी करण्यात आली होती. या ९४० अत्यावश्यक सेवा पुरवणाऱ्या कर्मचाऱ्यांपैकी एकालाही अद्याप लस मिळाली नाही. त्यामुळे प्रशासन नेमके काय करत आहे, असा प्रश्न आता उपस्थित केला जातो आहे.
प्रशासनाच्या ढिसाळ कारभारामुळे लसीकरणाचा वेग कमी..
लसीकरणाच्या पहिल्या टप्प्यात केवळ वैद्यकीय कर्मचारी आणि अत्यावश्यक सेवा पुरवणाऱ्या कर्मचाऱ्यांना ही लस देण्यात येणार असल्याचे जाहीर करण्यात आले होते. या सर्वांना लसीकरणासाठी नाव नोंदवणे गरजेचे आहे. एकीकडे केंद्र आणि राज्य सरकार कमीत कमी वेळेत जास्तीत जास्त नागरिकांना लस टोचण्याचे लक्ष्य ठेऊन असताना, प्रशासनाचा अशा हलगर्जीपणामुळे यात अडथळे येताना दिसून येत आहे.
अत्यावश्यक कर्मचाऱ्यांपर्यंत पोहोचली नाही माहिती..
ग्वाल्हेरच्या जैरोग्य रुग्णालयात सोमवारपासून लसीकरणाला सुरुवात होणार होती. या टप्प्यामध्ये ९४० अत्यावश्यक कर्मचाऱ्यांना लस देण्याचे नियोजन करण्यात आले होते. मात्र, या सर्वांची नोंदणी एकाच मोबाईल नंबरने करण्यात आल्यामुळे या सर्वांना लसीकरणाचा दिवस आणि वेळ असलेला महत्त्वाचा संदेशच पोहोचला नाही. त्यामुळे सात केंद्रांवर होणारे हे लसीकरण सुरुच झाले नाही.
हेही वाचा : पालघर जवान हत्या प्रकरण : तपासासाठी महाराष्ट्र पोलीस झारखंडमध्ये दाखल
