चंदीगड : सकाळी प्रकाश सिंग बादल यांचे अंतिम दर्शन घेतल्यानंतर दुपारी 1 वाजता अंत्यसंस्कार करण्यात येणार आहेत. त्यानिमित्त पंजाबचे मुख्यमंत्री भगवंत मान आज बादल गावात जाऊन श्रद्धांजली वाहणार आहेत. याशिवाय पंजाबचे राज्यपाल बनवारीलाल पुरोहित आणि जेपी नड्डाही येणार आहेत. राजस्थानचे मुख्यमंत्री अशोक गेहलोत हेही प्रकाश सिंग बादल यांच्या अंत्यसंस्काराला उपस्थित राहणार आहेत.
वडिलोपार्जित शेतात अंत्यसंस्कार करण्यात येणार : गावातील स्मशानभूमीत जागा कमी असल्याने माजी मुख्यमंत्र्यांवर त्यांच्या वडिलोपार्जित शेतात अंत्यसंस्कार करण्यात येणार असल्याचे सांगण्यात येत आहे. त्यामुळे दोन एकर जागेत प्लॅटफॉर्म बनविण्याचे काम बुधवारी सायंकाळी उशिरापर्यंत पूर्ण झाले. तत्पूर्वी बुधवारी सकाळी त्यांचे पार्थिव चंदीगड येथील अकाली दलाच्या कार्यालयात अंतिम दर्शनासाठी ठेवण्यात आले होते. जिथे पंतप्रधान नरेंद्र मोदींनी त्यांना श्रद्धांजली वाहिली. अंत्यसंस्कार केल्यानंतर कुटुंबीयांनी मृतदेह चंदीगडहून बादल गावात नेला. हे कुटुंब राजपुरा, पटियाला, संगरूर, बर्नाला आणि भटिंडा मार्गे मुक्तसर जिल्ह्यातील बादल गावात पोहोचले.
सुखबीर बादल पाणावलेल्या डोळ्यांनी लोकांशी हात जोडताना दिसले : माजी मुख्यमंत्री प्रकाश सिंग बादल यांच्या चंदीगड ते गाव बादल या शेवटच्या प्रवासादरम्यान, समर्थकांनी वेगवेगळ्या ठिकाणी फुलांचा वर्षाव करून श्रद्धांजली वाहिली. दरम्यान सुखबीर बादल पाणावलेल्या डोळ्यांनी लोकांशी हातमिळवणी करताना दिसले.
दोन दिवसांचा निवडणूक कार्यक्रम रद्द : ज्येष्ठ नेत्याच्या निधनानंतर केंद्र सरकारने 2 दिवसांचा राष्ट्रीय दुखवटा जाहीर केला आहे. राष्ट्रीय दुखवटा असल्याने देशभरातील ध्वज दिवसभर अर्ध्यावर फडकणार आहेत. तर सर्व सरकारी मनोरंजन कार्यक्रम तातडीने रद्द करण्यात आले आहेत. माजी मुख्यमंत्री प्रकाशसिंग बादल यांच्या निधनामुळे शिरोमणी अकाली दलाने जालंधर लोकसभा पोटनिवडणुकीसाठी असलेला दोन दिवसांचा निवडणूक कार्यक्रम रद्द केला. तर भाजपनेदेखील एक दिवसाचा कार्यक्रम रद्द केला आहे.
बादल हे भारतीय राजकारणातील एक महान व्यक्तिमत्त्व : बादल यांच्या निधनाने माझे वैयक्तिक नुकसान झाले आहे, अशा शब्दात पंतप्रधान मोदींनी मंगळवारी शोक प्रगट केला होता. पंतप्रधानांनी ट्विट म्हटले, की प्रकाशसिंग बादल यांच्या निधनाने मला खूप दु:ख झाले आहे. बादल हे भारतीय राजकारणातील एक महान व्यक्तिमत्त्व होते. त्यांनी देशाच्या विकासात महत्त्वाचे योगदान दिले. बादल भारतीय राजकारणातील एक उत्तुंग व्यक्तिमत्व आणि एक महत्त्वाचे राजकारणी होते.
भारताचे नेल्सन मंडेला म्हणून केले होते कौतुक : प्रकाशसिंग बादल यांचे राजकारणात चांगलेच वजन होते. पंतप्रधान नरेंद्र मोदीही त्यांच्या पायाला हात लावून नमस्कार करायचे. बादल यांनी 75 वर्षे यशस्वी राजकीय जीवन जगले. या काळात ते पाच वेळा पंजाबचे मुख्यमंत्री बनले. तर सलग 11 निवडणुका जिंकल्या आहेत. पूर्वीपासूनच प्रकाश सिंह बादल आणि नरेंद्र मोदी यांचे चांगले संबंध राहिले होते. एकदा पंतप्रधान मोदींनी बादल यांना 'भारताचे नेल्सन मंडेला' म्हटले होते. दरम्यान, इंदिरा गांधींच्या कारकिर्दीत लागू करण्यात आलेल्या आणीबाणीच्या विरोधात आवाज उठवणाऱ्या नेत्यांचा त्यांनी गौरव केला.
हेही वाचा : Amit Shah Nagpur Visit: केंद्रीय गृहमंत्री अमित शाह यांचा आजचा नागपूर दौरा रद्द
