चेन्नई - तामिळनाडूत गाजत असलेल्या तुतिकोरीनमधील पिता-पुत्राच्या मृत्यूचा तपास केंद्रीय अन्वेषण विभागाने (सीबीआय) आज(बुधवारी) हातात घेतला. सीबीआयकडे तपास देण्यात वेळ जाईल, तोपर्यंत पुराव्यांची अफरातफर होऊ नये म्हणून मद्रास उच्च न्यायालायाने तपास घाईघाईने गुन्हे शाखेकडे वर्ग केला होता. दरम्यान, गुन्हे शाखेने आज आणखी पाच पोलिसांची चौकशी केली आहे.
गुन्हे शाखेकडून मागील काही दिवसांपासून तपास सुरु होता. आता या प्रकरणाचा सगळा तपास सीबीआयच्या हातात आला आहे. लॉकडाऊन नियमांचे उल्लंघन केल्याप्रकरणी तुतिकोरीनमधील पिता-पुत्राला पोलिसांनी ताब्यात घेतले होते. मात्र, पोलीस कोठडीतील छळामुळे दोघांचा मृत्यू झाल्याचा आरोप पोलिसांवर आहे. या प्रकरणी राज्यात संतापाची लाट पसरली असून पोलिसांना आरोपी ठरवत त्यांच्यावर गुन्हा दाखल करण्यात आला आहे.
पिता-पुत्र कोठडीतील मृत्यू प्रकरणाचा तपास करण्यासाठी सीबीआयचे विशेष पथक राज्यात दाखल झाले आहे. राज्य सरकार आणि केंद्र सरकारच्या सुचनेनुसार कोठडीतीली मृत्यू प्रकरणी सीबीआयने आरोपांनुसार दोन गुन्हे दाखल केले आहेत, असे सीबीआयचे प्रवक्ते आर. के गौर यांनी सांगितले.
जयराज आणि बेनिक्स यांच्या मृत्यूचा तपास सीबीआयकडे देण्यासासाठी मुख्यमंत्री के. पलानीस्वामी यांनी गृहमंत्री अमित शाह यांना पत्र लिहले होते. त्यानंतर केंद्र सरकारने या प्रकरणाचा तपास हातात घेत असल्याची सुचना काल(मंगळवारी) जारी केली होती. या प्रकरणात संथनकुलम पोलीस ठाण्यातील 5 पोलिसांना अटक करण्यात आली आहे. यामध्ये एका पोलीस उपनिरिक्षकाचाही समावेश आहे.
काय आहे प्रकरण?
तुतीकोरीनमधील संथलकुलम येथे जयराज आणि त्यांचा मुलगा बेनिक्सने लॉकडाऊनमध्ये ठरवून दिलेल्या वेळेपेक्षा जास्त काळ मोबाईलचे दुकान उघडे ठेवल्याने पोलिसांनी त्यांना ताब्यात घेतले होते. 23 जूनला दोघांना पोलीस कोठडीत ठेवले. कोठडीत छळ केल्यामुळे मृत्यू झाल्याचा आरोप कुटुंबियांनी पोलिसांवर ठेवला आहे. पोलीस कोठडीतून त्यांना रुग्णालयात दाखल करण्यात आले होते. मात्र, उपचारादरम्यान दोघांचा मृत्यू झाला होता. याप्रकरणी राज्यातील वातावरण पेटले असून पोलीसांच्या छळाविरुद्ध नागरिकांतून संताप व्यक्त केला जात आहे.
