धमतरी - स्त्रीची आई होण्याची इच्छा असणे ही सामान्य बाब आहे. मूल न झालेल्या महिलांनाही आई होण्याची संधी देण्यासाठी वैद्यकीय तंत्रज्ञानाने मोठी प्रगती केली आहे. मात्र, मूल होण्यासाठी या तंत्रज्ञानाचा आधार न घेता भलतेच उपाय केले जाण्याची संख्याही मोठी आहे. छत्तीसगडमधील धमतरी येथील अंगारमोती मंदिरातही अशीच थोतांड असलेली अघोरी परंपरा सुरू आहे. याविषयी ऐकल्यानंतर डोके सुन्न होईल.
छत्तीसगडमधील अंगारमोती मंदिरात अपत्यहीन महिला दिवाळीच्या आधीच्या शुक्रवारी मंदिरासमोर नारळ हातात घेऊन उभ्या असतात. येथील मंदिराच्या बैगाचा (पुजारी अथवा तत्सम व्यक्ती) पाय अंगावर पडल्यास मुले होता, असा अंधविश्वास येथील लोकांमध्ये आहे. यासाठी बैगा मंदिराकडे येत असताना या महिला मंदिरासमोर ओळीने रस्त्यात पालथ्या झोपतात. मंदिराचे अनेक बैगा आहेत. त्यांच्यावर अंगारमोती ही देवी बसलेली असते, असा समज आहे. हे बैगा या महिलांच्यावरून चालत मंदिरात येतात. यावर कहर म्हणजे येथील स्थानिक शिकलेले लोक आणि चक्क डॉक्टरसुद्धा या अघोरी प्रकारामुळे त्या महिलांना मुले होतात, असे सांगत आहेत.
गंगरेल धरणाच्या तीरावर अंगारमोती मंदिराची स्थापना
सध्या अपत्यहीन जोडप्यांना मुले होण्यासाठी सध्या अत्याधुनिक टेस्ट ट्यूब बेबी आणि आयव्हीएफ तंत्रज्ञान उपलब्ध आहे. मात्र, या अघोरी प्रथेकडे लोकांचा असलेला ओढा अचंबित करणारा आहे. जेव्हा गंगरेल धरण तयार झाले नव्हते, तेव्हा तेथील गावातील लोक अंगारमोती या देवीला मानत असत. धरण तयार झाल्यानंतर ही गावे पाण्याखाली गेली. यानंतर गावकऱ्यांनी गंगरेलच्या तीरावर या देवीची स्थापना केली. मात्र, ही परंपरा केव्हा सुरू झाली, याविषयी निश्चित माहिती उपलब्ध नाही.
मानवाधिकारांच्या दृष्टीने विचार केल्यास ही प्रथा हा महिलांवरील अत्याचार आहे. मात्र, याविरोधात कारवाई करण्याचे केलेले प्रयत्न निष्फळ ठरले आहेत.
ईटीव्ही भारत कोणत्याही अंधश्रद्धेचे समर्थन करत नाही.
