कोलकाता - राजधानी दिल्लीमध्ये झालेल्या हिंसाचारावर नोबेल पारितोषिक विजेते अमर्त्य सेन यांनी प्रतिक्रिया दिली आहे. 'भारत एक धर्म निरपेक्ष देश असून धार्मिक आधारावर विभागला जाऊ शकत नाही, दिल्लीमध्ये अल्पसंख्यकांवर अत्याचार होत असताना ते रोखण्यास पोलीस अपयशी ठरल्याचे' सेन म्हणाले.
कोलकात्यात आयोजित एका कार्यक्रमात अमर्त्य सेन बोलत होते. 'हिंसा रोखण्यास पोलीस अपयशी ठरले की, सरकारकडून प्रयत्न कमी पडले याची चौकशी व्हायला पाहिजे. देशाची राजधानी आणि केंद्राच्या ताब्यात असलेल्या दिल्लीत अशी घटना घडल्याने मी चिंतीत आहे. अल्पसंख्यांकावर अत्याचार होत असताना पोलीस आपले कर्तव्य निभावण्यात कमी पडत असतील तर हे काळजी करण्यासारखे आहे', असे सेन म्हणाले.
'हिंसाचारात सर्वात जास्त बळी मुस्लिमांचा गेला असे वृत्त ऐकायला मिळत आहे. भारत एक धर्मनिरपेक्ष देश आहे. आपण हिंदू आणि मुस्लिमांना विभागू शकत नाही. एक नागरिक म्हणू चिंता करण्यापडीकडे मी काहीही करू शकत नाही, असेही सेन म्हणाले.
संपूर्ण प्रकरणाची चौकशी केल्याशिवाय निष्कर्ष काढू शकत नाही. दिल्ली उच्च न्यायालयाचे न्यायाधीश एस. मुरलीधर यांच्या बदलीविषयी प्रश्न उपस्थित होणं सहाजिक आहे. मी त्यांना वैयक्तीकरित्या ओळखतो. मात्र, यावर मी काही बोलू शकत नाही, असे सेन म्हणाले.
