चंदीगड - पंजाबमधील पठाणकोट येथील सैन्य रुग्णालयातील डॉक्टरही कोरोनासोबत लढण्यासाठी दिवसरात्र मेहनत घेत आहेत. अशात नुकतच त्यांनी एका नवजात बालकावर तातडीने शस्त्रक्रिया करुन या बालकाला जीवदान दिले आहे. सैन्याने शनिवारी याबद्दलची माहिती दिली.
सैनिकाच्या एका दिवसाच्या बाळाला आतड्यांमधील एक दुर्मिळ जन्मजात आजार असल्याचा संशय होता. ज्यामुळे, आतड्यांमध्ये ब्लॉक तयार होऊन मलमार्गाच्या सहाय्याने ओटीपोटात मलविसर्जन होऊन सेप्टिक झाले होते. या आजाराचे तातडीने निदान झाले होते. मात्र, बाळाची प्रकृती चिंताजनक होती त्यामुळे, त्याला चंदिगडजवळील चांदीमंदिर येथील सशस्त्र दलाच्या बालरोग शस्त्रक्रिया केंद्रात घेऊन जाणे शक्य नव्हते. कारण हे अंतर सहा तासांचे होते. तर, दुसरीकडे लॉकडाऊनमुळे पठाणकोटच्या सिव्हिल रुग्णालयामध्ये बालरोग सर्जन उपलब्ध नव्हते.
अशा परिस्थितीत पठाणकोट मिलिटरी हॉस्पिटलचे सर्जिकल स्पेशलिस्ट मेजर आदिल अब्दुल कलाम यांनी व्हेंटिलेटरवर असलेल्या या नवजात बाळाचे ऑपरेशन केले. ओटीपोटाचे गुंतागुंतीचे आणि आव्हानात्मक ऑपरेशन त्यांनी केले. एखाद्या नवजात बालकावर असे गुंतागुंतीचे ऑपरेशन सशस्त्र बल वैद्यकीय सेवांमध्ये पहिल्यांदाच झाले. झोनल हॉस्पिटलमध्ये झालेल्या या ऑपरेशनसाठी बालरोग तज्ञही उपलब्ध नव्हते.
आपात्कालीन परिस्थितीत हे ऑपरेशन केले गेले. यासाठी थोडाही उशीर झाला असता तरी बालकाच्या अनेक अवयवांना नुकसान पोहोचले असते. यामुळे, मुलाचा मृत्यू होण्याची शक्यता होती. यावर बोलताना डॉक्टरांनी सांगितले, सुपर स्पेशालिटी सुविधा नसतानाही हे ऑपरेशन करणे अत्यंत आव्हानात्मक आणि तणावपूर्ण काम होते.
