नवी दिल्ली - दिल्लीमध्ये विधानसभा निवडणुकांच्या पार्श्वभूमीवर प्रचाराच्या तोफा कडाडत आहेत. डब्ल्यूडब्ल्यूएफ विजेते ग्रेट खली भाजपकडून स्टार प्रचारक म्हणून रिंगणात उतरले आहेत. आज सायंकाळी प्रचाराच्या तोफा थंडावणार आहेत. उरलेल्या तासांमध्ये सर्वच पक्षांकडून टिच्चून प्रचार केला जात आहे. अधिकाधिक मतदारांना आपल्या पक्षाकडे आकर्षित करण्यासाठी विविध पर्यायांचा वापर करण्यात येत आहे.
भाजप उमेदवार सुमन गुप्ता यांच्यासाठी खली उतरले मैदानात
चांदणी चौकातील जागेसाठी भाजपने सुमन गुप्ता यांना उमेदवारी दिली आहे. ते यापूर्वी नगरसेवक राहिले आहेत. त्यांच्यासाठी ग्रेट खली यांनी रस्त्यावर उतरत प्रचार केला. खली यांना पाहण्यासाठी त्यांच्या चाहत्यांनी गर्दी केली होती. यामुळे गुप्ता यांना मोठ्या प्रमाणात समर्थन मिळाल्याचे दिसत आहे.
हेही वाचा - मध्य प्रदेश : मुले चोरीच्या संशयावरून सहा शेतकऱ्यांना मारहाण, एकाचा मृत्यू
'देशात कुठेही प्रचार करायला तयार'
भाजपचे स्टार प्रचारक खली यांनी देशात कुठेही प्रचार करण्यास तयार असल्याचे म्हटले आहे. 'सध्या विरोधी पक्ष ज्या प्रकारचे वातावरण देशभरात तयार करत आहेत, ते पाहता गरज पडली तर मी काश्मीरमध्येही प्रचार करेन,' असे खली म्हणाले. 'निवडणुकीच्या निमित्ताने देशातील लोकांना भेटता येत आहे आणि पुढेही देशाची सेवा करण्याची संधी मिळू शकते', असे ते म्हणाले.
दिल्लीमध्ये चांदणी चौक हा सर्वांत लहान विधानसभा मतदार संघ आहे. या मतदारसंघातून आम आदमी पक्षाच्या माजी आमदार अलका लांबा आता काँग्रेसच्या तिकिटावर रिंगणात उतरल्या आहेत. तर, आम आदमी पक्षाकडून प्रह्लाद सिंह साहनी यांना तिकीट मिळाले आहे. ते यापूर्वीही या मतदारसंघातून आमदार राहिले आहेत. येथे तीनही उमेदवारांनी आपली ताकद लावली आहे. त्यामुळे तिरंगी लढत पाहायला मिळण्याची शक्यता आहे.
हेही वाचा - बिहारमध्ये कन्हैया कुमारवर पुन्हा हल्ला; दगडफेकीत कन्हैया जखमी
