नवी दिल्ली - आज सकाळी गुजरातच्या कच्छ जिल्ह्यातील सर क्रीक भागामध्ये गस्तीवर असणाऱ्या सीमा सुरक्षा दलाच्या जवानांनी दोन पाकिस्तानी बोटी जप्त केल्या आहेत. एका अधिकाऱ्याने ही माहिती दिली आहे.
संबधीत बोटीमध्ये फक्त मासे पकडण्याची साधने होती. या बोटींवर कोणीच स्वार नव्हते. बोटी जप्त केल्यानंतर जवानांनी शोधमोहिम सुरू केली. मात्र अद्याप कोणतीच संशयास्पद गोष्ट सापडली नसल्याची माहिती मिळत आहे. यापूर्वीही अनेकदा सर क्रीक भागामध्ये पाकिस्तानी मच्छीमारांनी सागरी हद्द ओलांडली आहे. यावर्षीच्या मे महिन्यामध्येदेखील सुरक्षादलांनी पाकिस्तानी बोटी पकडल्या होत्या.
जम्मू काश्मीरला विशेष दर्जा देणारे कलम ३७० हटवण्यात आल्यामुळे दहशतवादी हल्ला करू शकतात, अशी माहिती गुप्तचर संघटनांनी दिली आहे. त्यामुळे देशातील काही शहरांमध्ये हाय अर्लट जारी करण्यात आला आहे.
