चंदीगड - तुम्ही बेवफा सनम, बेवफा आशिक असे प्रकार ऐकले असाल. मात्र, कधी 'बेवफा चायवाला' ऐकलाय? नाही, हा राजकीय टोला नाही. किंवा, हा कोणी धोकेबाज चहावालाही नाही. तर हे आहे, हरियाणामधील एका चहाच्या दुकानाचे नाव.
हरियाणाच्या सोनिपतमध्ये हा 'बेवफा चायवाला' बराच प्रसिद्ध आहे. या चहाच्या दुकानाचे वैशिष्ट्य म्हणजे, इथे प्रेमी जोडप्यांना आणि प्रेमाच्या बाबतीत कमनशिबी ठरलेल्या लोकांना वेगवेगळ्या दरात चहा मिळतो.
असा आहे दर..
प्रेमात 'धोका' मिळालेल्या लोकांना इथे २५ रुपयांना चहा मिळतो. मात्र, प्रेमी जोडप्यांना इथे २० रुपयांना एक कप चहा मिळतो. तुम्ही सध्या कोणासोबततरी रिलेशनशिपमध्ये असाल, आणि तुम्ही तिथे एकटे गेलात, तरीही तुम्हाला २० रुपयांनाच चहा मिळतो हे विशेष!
दरम्यान, देशाचे रक्षण करणाऱ्या सैनिकांना इथे पूर्णपणे मोफत चहा दिला जातो. तसेच, दुकानात मिळणारे इतर खाद्य पदार्थ मोफत घरपोच सेवाही दिली जाते. इथे एसीमध्ये बसण्याची सुविधाही आहे, हे विशेष!
दुकानात मिळतो तब्बल २१ प्रकारचा चहा..
केवळ वेगवेगळ्या दरातच नाही, तर विविध प्रकारचा चहाही इथे उपलब्ध आहे. या दुकानात तब्बल २१ प्रकारचा चहा मिळतो. आपल्याला मसाला चहा, आल्याचा चहा, कोरा चहा, तंदुरी चहा असे काही प्रकार माहिती आहेतच. मात्र, या दुकानात या प्रकारांसह एकूण २१ प्रकारच्या चहाचा आस्वाद लोकांना घेता येतो.
दुकान ठरतंय लोकांसाठी आकर्षण..
या दुकानात येणाऱ्या काही ग्राहकांशी 'ईटीव्ही भारत'च्या प्रतिनिधींनी चर्चा केली. त्यांनी सांगितले, की दुकानाच्या या आगळ्यावेगळ्या नावामुळेच आपण पहिल्यांदा इथे आलो होतो. तसेच इथे चहाचे वेगवेगळे प्रकार मिळत असल्यामुळेदेखील आपण येत असल्याचे त्यांनी सांगितले.
हेही वाचा : चुनावी जुमला.. मोदी आणि शाहांविरोधात दाखल झाला खटला!
