हैदराबाद - तेलंगाणाच्या राज्यपाल तमिलिसाई सुंदरराजन आणि मुख्यमंत्री के सी राव यांच्यात गेल्या अनेक दिवसांपासून वाद सुरू आहे. त्याबाबत आज पुन्हा हा वाद उफाळून आला आहे. राज्यपाल तमिलिसाई सुंदरराजन यांनी पुद्दुचेरीमध्ये माध्यमांशी बोलताना पुन्हा एकदा के सी राव यांच्यावर निशाना साधला आहे. तेलंगणात काय चालले आहे ते लोक पाहत आहेत. मुख्यमंत्र्यांकडून होत असलेला संविधानाचा अवमान इतिहासात नोंदवला जाईल असेही तमिलिसाई म्हणाल्या. प्रजासत्ताक दिन सोहळा सार्वजनिक ठिकाणी होऊ नये, यासाठी काही लोकांनी प्रयत्न केल्याचा त्यांनी आरोपही केला आहे.
प्रजासत्ताक दिन साजरा करण्यासाठी सरकारला पत्र : राज्यपाल तमिलिसाई म्हणाल्या, प्रजासत्ताक दिन भव्य पद्धतीने साजरा करण्यासाठी 2 महिन्यांपूर्वी सरकारला पत्र लिहिले होते. सरकारने दोन दिवसांपूर्वी राजभवनात उत्सव साजरा करावा, असे सांगितले. मात्र तरीही केंद्राच्या मार्गदर्शक सूचनांकडे राज्याने दुर्लक्ष केले. त्याचे उत्तरही सरकारने पाठवले नाही. नागरिकांमध्ये प्रजासत्ताक दिन साजरा केल्याने आनंद मिळत असल्याचेही त्यांनी यावेळी स्पष्ट केले. कोरोनानंतर प्रथमच राजभवनात प्रजासत्ताक दिनाचा सोहळा आयोजित करण्यात आला.
राजभवनात फडकावला राष्ट्रध्वज : राज्यपाल तमिलिसाई सुंदरराजन यांनी प्रजासत्ताक दिनानिमित्त हैदराबाद येथील राजभवनात राष्ट्रध्वज फडकावला. मात्र या सोहळ्यात तेलंगणाचे मुख्यमंत्री के. चंद्रशेखर राव सहभागी झाले नाहीत. त्यामुळे राज्यपाल आणि मुख्यमंत्री यांच्यातील वाद आणखी उफाळून आला. राज्यपालांनी लोकशाहीचा सन्मान करण्याचे आवाहन केले. आपण नागरिकांसाठी काम करणार असल्याने काही जणांना ते आवडत नसल्याचा टोलाही त्यांनी यावेळी लगावला.
मला तेलंगणातील लोक आवडतात : तेलंगणाशी माझे नाते केवळ तीन वर्षांचे नाही. तर ते जन्मापासून असल्याचे राज्यपाल तमिलिसाई यांनी यावेळी स्पष्ट केले. तेलंगणातील जनतेच्या विकासात माझे योगदान निश्चितच असेल अशी ग्वाहीही त्यांनी यावेळी दिली. माझी सर्वात मोठी ताकद मेहनत आणि प्रामाणिकपणा असल्याचे त्यांनी यावेळी सांगितले. मात्र काही लोकांना मी आवडत नाही, पण मला तेलंगणातील लोक आवडतात असेही त्यांनी यावेळी स्पष्ट केले. त्यामुळे कितीही अडचणी आल्या तरी मी मेहनत करत राहीन असेही त्या यावेळी म्हणाल्या. यावेळी त्यांनी बाबासाहेब आंबेडकरांचा दाखला दिला. त्या म्हणाल्या विकास सर्वांपर्यंत पोहोचला पाहिजे. एका वर्गाला सर्व सवलती आहेत आणि एका वर्गाकडे सर्व गोष्टींचा भार आहे, असे होऊ नये. विकासात सर्वांचा समान वाटा असायला हवा, असेही राज्यपाल तमिलीसाई म्हणाल्या.
राज्यपालांनी यांना केले सन्मानित : याप्रसंगी सुप्रसिद्ध तेलुगू संगीतकार एम. एम. कीरावानी, गीतकार चंद्रा बोस, टेबल टेनिसपटू श्रीजा अकुला, आयएएस प्रशिक्षक एम. बाला लथा, के. लोकेश्वरी (पॅरा अॅथलीट) आणि एनजीओ 'भगवान महावीर विकलांग साहित्य समिती' यांना राज्यपाल तमिलीसाई यांनी सन्मानीत केले.
हेही वाचा - Actor Annu Kapoor Hospitalised :छातीत दुखू लागल्याने अभिनेता अन्नू कपूर दिल्लीतील रुग्णालयात दाखल
