തൃശൂർ: കൈപ്പറമ്പ്-തലക്കോട്ടുകര റോഡിൽ കുറുമാൽ പള്ളിക്ക് സമീപം നാടോടി സ്‌ത്രീകളുടെ മോഷണ ശ്രമം. പ്രദേശത്തെ വീട്ടുമുറ്റത്ത് നിന്ന് പാത്രങ്ങളും ഇരുമ്പ് പൈപ്പുകളും മറ്റു വീട്ടുപകരണങ്ങളും ചാക്കിലാക്കി കൊണ്ടുപോകാൻ ഒരുങ്ങിയ അഞ്ച് നാടോടി സ്ത്രീകളിൽ മൂന്നു പേരെ നാട്ടുകാർ ഓടിച്ചിട്ട് പിടിച്ചു (Robbery By Nomadic Women In Thrissur). ഓടി രക്ഷപ്പെട്ട രണ്ടുപേരെ കണ്ടെത്താൻ കഴിഞ്ഞിട്ടില്ല. എരുമപ്പെട്ടി പൊലീസ് സ്ഥലത്തെത്തി മൂന്ന് സ്ത്രീകളെ കസ്റ്റഡിയില്‍ എടുക്കുകയും പ്രദേശവാസികള്‍ക്ക് ജാഗ്രത നിര്‍ദേശം നല്‍കുകയും ചെയ്‌തു.
തമിഴ്‌നാട്ടുകാരായ ഒരു സംഘം മോഷ്‌ടാക്കൾ പിടിയിൽ: കോഴിക്കോട് നിന്നും മാല മോഷണ കേസില്‍ പിടിയിലായ നാടോടി സ്‌ത്രീകളിലൂടെ തമിഴ്‌നാട്ടുകാരായ ഒരു സംഘം മോഷ്‌ടാക്കൾ അറസ്‌റ്റിൽ. മാർച്ച് ഒന്നിന്‌ രാവിലെ കോഴിക്കോട് ബസ് സ്‌റ്റാന്‍ഡില്‍ നിന്ന് സുധയെന്ന വീട്ടമ്മയുടെ മാല തമിഴ്‌നാട് സ്വദേശിനി കവരുകയായിരുന്നു (Group Of Thieves Have Been Arrested In Kozhikode).
സംഭവത്തെ തുടര്‍ന്ന് വീട്ടമ്മ മോഷ്‌ടാവിനെ കീഴ്‌പ്പെടുത്തുകയും യുവതിയേയും ഇവര്‍ക്കൊപ്പമുണ്ടായിരുന്ന മറ്റ് രണ്ട് പേരെയും പൊലീസില്‍ ഏല്‍പ്പിക്കുകയും ചെയ്‌തു. തുടര്‍ന്ന് നടത്തിയ അന്വേഷണത്തിലാണ് മോഷ്‌ടാക്കളെ കുറിച്ച് വിവരം ലഭിച്ചത്.
അറസ്‌റ്റിലായവരിൽ നിന്നും മൊബൈല്‍ ഫോണുകളും പെന്‍ഡ്രൈവുകളും സ്വര്‍ണാഭരണങ്ങളും പണവും കണ്ടെത്തിയി. പിടിയിലായവർ വിവിധ പൊലീസ് സ്‌റ്റേഷനുകളിലായി നിരവധി കേസുകളില്‍ പ്രതികളാണെന്ന് സിറ്റി പൊലീസ് കമ്മിഷണര്‍ രാജ്‌പാല്‍ മീണ പറഞ്ഞു. സംഘത്തില്‍ ഇനിയും ആളുകളുണ്ടെന്നും അവരെ കണ്ടെത്തുന്നതിനായി അന്വേഷണം പുരോഗമിക്കുകയാണെന്നും കമ്മിഷണര്‍ പറഞ്ഞു.
മോഷണം നടത്തിയിരുന്ന രണ്ട് പേർ പിടിയിൽ: ആളില്ലാത്ത വീടുകളിൽ അതിക്രമിച്ച് കയറി മോഷണം നടത്തിയിരുന്ന നാലംഗ സംഘത്തിലെ രണ്ട് പേർ പൊലീസ് പിടിയിൽ. പശ്ചിമ ബംഗാളിലെ കൂച്ച് ബെഹാർ സ്വദേശിയായ സിറാജുദ്ദീൻ എന്ന ശിവ ബംഗാളി (36), ഷാംലി ജില്ലയിലെ കൈരാന സ്വദേശിയായ ഷഹ്‌സാദ് എന്ന പഹൽവാൻ (32) എന്നിവരെയാണ് പൊലീസ് പിടികൂടിയത് (Theives Arrested In Noida).
നോയിഡയിലെ സമ്പന്നരായ ആളുകൾ താമസിക്കുന്ന സ്ഥലങ്ങളില്‍ കോട്ടും സ്യൂട്ടും ധരിച്ച് ഇയർഫോണും വച്ച് കറങ്ങി നടക്കുന്നതിനിടെയാണ് ഇവർ പിടിയിലാകുന്നത്. ആളില്ലാത്ത വീടുകൾ നോക്കി വച്ചാണ് സംഘം മോഷണം നടത്തുന്നത്. ഇവരുടെ പേരിൽ ഒന്നിലധികം മോഷണക്കേസുകളുണ്ടെന്ന് പൊലീസ് പറഞ്ഞു.
ഇവരിൽ നിന്ന് 5 ലക്ഷം രൂപ വില മതിക്കുന്ന 75 ഗ്രാം സ്വർണം കണ്ടെടുത്തിട്ടുണ്ട്. ഈ സ്വർണം മോഷണ മുതലാണെന്ന് നോയിഡ അഡിഷണൽ ഡിസിപി ശക്തി മോഹൻ അവസ്‌തി പറഞ്ഞു. നാലംഗ സംഘത്തിലെ മറ്റ് രണ്ട് പേരെ തിരിച്ചറിഞ്ഞിട്ടുണ്ട്. ഇവർക്കായുള്ള തെരച്ചിൽ പൊലീസ് ഊർജിതമാക്കിയിട്ടുണ്ട്.
