തൃശ്ശൂര്‍ : കാറളം എസ്.ബി.ഐ (Kaaralam SBI) ബാങ്കില്‍ 2.76 കോടി രൂപയുടെ സ്വര്‍ണ പണയ തിരിമറി നടത്തിയ കേസിലെ പ്രതി പിടിയില്‍. ബാങ്കിലെ ചീഫ് അസോസിയേറ്റ് ഓഫിസറായിരുന്ന ഇരിങ്ങാലക്കുട കാരുകുളങ്ങര സ്വദേശി സുനില്‍ ജോസാണ് ക്രൈബ്രാഞ്ചിന് മുന്നില്‍ കീഴടങ്ങിയത്. 2018 ഒക്‌ടോബറിനും 2020 നവംബറിനും ഇടയിലായിരുന്നു തിരിമറി നടന്നത്.
ബാങ്കില്‍ പണയത്തിലിരിക്കുന്ന സ്വര്‍ണം ഇയാളുടെ ബന്ധുക്കളുടെയും സുഹൃത്തുക്കളുടെയും പേരില്‍ വീണ്ടും പണയം വച്ചായിരുന്നു തട്ടിപ്പ്. ഇടപാടുകാരോടും ബാങ്ക് ജീവനക്കാരോടും ഏറെ സൗഹൃദം കാത്തുസൂക്ഷിച്ചിരുന്ന പ്രതി വിദഗ്‌ധമായാണ് തട്ടിപ്പ് നടത്തിയത് (Kaaralam SBI Fraud Case). ബ്രാഞ്ച് മാനേജരും, ഗോള്‍ഡ് അപ്രൈസറും, ചീഫ് അസോസിയേറ്റുമാണ് ലോക്കറിന്റെ താക്കോലുകള്‍ സൂക്ഷിച്ചിരുന്നത്.
Also Read: Sabarimala : പത്തനംതിട്ട കെഎസ്ആർടിസി ഡിപ്പോയെ ശബരിമല ഇടത്താവളമാക്കി
ബാങ്കില്‍ നടന്ന ഓഡിറ്റിങ്ങിലാണ് തട്ടിപ്പ് നടന്ന വിവരം പുറത്തറിയുന്നത്. അസിസ്റ്റന്റ് ജനറല്‍ മാനേജരുടെ പരാതിയില്‍ കാട്ടൂര്‍ പൊലീസ് കേസെടുത്തു. എന്നാല്‍ വലിയ തുകയുടെ തിരിമറിയായതിനാല്‍ കേസ് ക്രൈംബ്രാഞ്ചിന് വിടുകയായിരുന്നു.
എഴുപത്തിയാറ് പായ്ക്കറ്റ് സ്വര്‍ണ പണയ ഉരുപ്പടികളാണ് ഇയാള്‍ വീണ്ടും പണയപ്പെടുത്തിയത്. രണ്ട് കോടി എഴുപത്തിയാറ് ലക്ഷം രൂപയുടെ തിരിമറി നടന്നതായാണ് വിവരം. സംഭവത്തില്‍ ഉദ്യോഗസ്ഥനേയും മാനേജരേയും സര്‍വീസില്‍ നിന്ന് സസ്‌പെന്‍ഡ് ചെയ്തിരുന്നു.
