തൃശൂർ: 2015ലെ വോട്ടർ പട്ടിക അടിസ്ഥാനമാക്കി തദ്ദേശ സ്വയംഭരണ തെരഞ്ഞെടുപ്പ് നടത്താനുള്ള സംസ്ഥാന തെരഞ്ഞെടുപ്പ് കമ്മിഷൻ തീരുമാനത്തിൽ തെരഞ്ഞെടുപ്പ് കമ്മിഷനോട് ഹൈക്കോടതി വിശദീകരണം തേടി. തൃശൂർ കോർപ്പറേഷൻ കൗൺസിലറും ജില്ലാ കോൺഗ്രസ് ജനറൽ സെക്രട്ടറിയുമായ എ.പ്രസാദ് സമർപ്പിച്ച ഹർജിയിന്മേലാണ് നടപടി.
തദ്ദേശ സ്വയംഭരണ തെരഞ്ഞെടുപ്പ്; തെരഞ്ഞെടുപ്പ് കമ്മീഷനോട് വിശദീകരണം ആവശ്യപ്പെട്ട് ഹൈക്കോടതി 2020ലെ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനായി 2015ലെ വോട്ടർ പട്ടിക ഉപയോഗിക്കാനാണ് സംസ്ഥാന തെരഞ്ഞെടുപ്പ് കമ്മിഷന്‍ തീരുമാനിച്ചിരുന്നത്. 2015ൽ നടന്ന തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ 2014ലെ പാർലമെന്റ് തെരഞ്ഞെടുപ്പിലെ വോട്ടർ പട്ടിക അടിസ്ഥാനമാക്കിയാണ് ഡാറ്റാബേസ് ഉണ്ടാക്കിയത്. ഈ വോട്ടർ പട്ടിക നിരവധി വർഷങ്ങളായി പുതുക്കാത്തതും മരണപ്പെട്ടവരെയും സ്ഥലം മാറിയവരേയും ഉൾപ്പെടുത്തുയുമുള്ളതാണ്. അതുകൊണ്ട് തന്നെ 2014ലെ വോട്ടർ പട്ടികയെ ആധാരമാക്കി 2020ലേക്കുള്ള വോട്ടർ പട്ടിക തയ്യാറാക്കുന്നത് വലിയ കാലതാമസത്തിനും നിരവധി പരാതികളുണ്ടാകുന്നതിനും കാരണമാകും. തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പുകൾ അനിയന്ത്രിതമായി വൈകാൻ ഇത് കാരണമായേക്കും എന്ന് ചൂണ്ടിക്കാട്ടിയാണ് തൃശൂർ ജില്ലാ കോൺഗ്രസ് കമ്മിറ്റിക്ക് വേണ്ടി എ.പ്രസാദ് ഹൈക്കോടതിയെ സമീപിച്ചത്.
