തിരുവനന്തപുരം: രാഹുൽ ഗാന്ധിയും പ്രിയങ്ക ഗാന്ധിയും തെരഞ്ഞെടുപ്പ് പ്രചാരണത്തിനായി കൂടുതൽ സമയം കേരളത്തിൽ വേണമെന്ന് രാഹുൽ ഗാന്ധിയോട് സംസ്ഥാന നേതാക്കൾ ആവശ്യപ്പെട്ടു. രാഹുൽ ഗാന്ധിയുമായി തിരുവനന്തപുരത്ത് വച്ച് നടത്തിയ ചർച്ചയിലാണ് നേതാക്കൾ ആവശ്യം ഉന്നയിച്ചത്.
തെരഞ്ഞെടുപ്പുമായി ബന്ധപ്പെട്ട കാര്യങ്ങൾ ചർച്ച ചെയ്യാൻ തിങ്കളാഴ്ച വൈകിട്ടാണ് രാഹുൽ ഗാന്ധി തിരുവനന്തപുരത്ത് എത്തിയത്. കെ പി സി സി പ്രസിഡന്‍റ് മുല്ലപ്പള്ളി രാമചന്ദ്രൻ, പ്രതിപക്ഷ നേതാവ് രമേശ് ചെന്നിത്തല, മുൻ മുഖ്യമന്ത്രി ഉമ്മൻ ചാണ്ടി എന്നിവരുമായി രാഹുൽ ചർച്ച നടത്തി. കേരളത്തിലെ പൊതു സാഹചര്യം രാഹുലിനെ അറിയിച്ചതായി ചർച്ചയ്ക്ക് ശേഷം പ്രതിപക്ഷ നേതാവ് രമേശ് ചെന്നിത്തല പറഞ്ഞു. തമിഴ്നാട്ടിൽ നിന്നും ഡൽഹിയിലേക്ക് മടങ്ങും വഴിയാണ് രാഹുൽ തിരുവനന്തപുരത്ത് എത്തിയത്. ചർച്ചകൾക്ക് ശേഷം രാത്രി ഒമ്പത് മണിയോടെ അദ്ദേഹം ഡൽഹിയിലേക്ക് മടങ്ങി.
