തിരുവനന്തപുരം: അട്ടപ്പാടി മഞ്ചിക്കണ്ടി വനമേഖലയില്‍ നടന്ന മാവോയിസ്റ്റ് ഏറ്റുമുട്ടല്‍ അന്വേഷിക്കുന്ന ക്രൈംബ്രാഞ്ച് അന്വേഷണ സംഘത്തലവനെ മാറ്റി. പാലക്കാട് ക്രൈംബ്രാഞ്ച് ഡിവൈ.എസ്.പി ഫിറോസ് എം. ഷെറീഫിനെയാണ് മാറ്റിയത്. തൃശൂര്‍ ക്രൈംബ്രാഞ്ച് ഡിവൈ.എസ്.പി ഉല്ലാസിനാണ് പകരം അന്വേഷണ ചുമതല.
മഞ്ചിക്കണ്ടിയില്‍ രണ്ടു ദിവസമായി നടന്ന ഏറ്റുമുട്ടലുകളില്‍ രണ്ട് പ്രത്യേക എഫ്‌.ഐ.ആറുകൾ രജിസ്റ്റര്‍ ചെയ്താണ് ക്രൈംബ്രാഞ്ച് അന്വേഷണം നടത്തുന്നത്. ഈ രണ്ടു കേസുകളും ഡിവൈഎസ്.പി ഫിറോസ് ആണ് അന്വേഷിച്ചിരുന്നത്. എന്നാല്‍ രണ്ടാം ദിവസത്തെ ഏറ്റുമുട്ടല്‍ നടക്കുമ്പോള്‍ അന്വേഷണ ഉദ്യോഗസ്ഥനായ ഫിറോസ് സംഭവത്തിനു സാക്ഷിയായിരുന്നുവെന്ന് ആരോപണം ഉയര്‍ന്നിരുന്നു. ഈ സാഹചര്യത്തില്‍ സംഭവത്തില്‍ സാക്ഷിയായ ഒരാള്‍ കേസ് അന്വേഷിക്കുന്നത് ഉചിതമല്ല എന്ന വിലയിരുത്തലിന്റെ അടിസ്ഥാനത്തിലാണ് ക്രൈംബ്രാഞ്ച് എ.ഡി.ജി.പി ടോമിന്‍ ജെ.തച്ചങ്കരി അന്വേഷണ ഉദ്യോഗസ്ഥനെ മാറ്റിയത്.
