തിരുവനന്തപുരം: തദ്ദേശ തെരഞ്ഞെടുപ്പിന്‍റെ ആദ്യഘട്ട വോട്ടെടുപ്പ് രാവിലെ ഏഴ്‌ മണിക്ക് ആരംഭിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, ഇടുക്കി ജില്ലകളിലാണ് തെരഞ്ഞെടുപ്പ് നടക്കുന്നത്. വൈകുന്നേരം ആറു മണി വരെയാണ് വോട്ടിങ്‌ സമയം. സുരക്ഷയൊരുക്കാന്‍ പൊലീസ് ഉദ്യോഗസ്ഥരെ ഓരോ ബൂത്തിലും വിന്യസിച്ചിട്ടുണ്ട്. തെരഞ്ഞെടുപ്പ് കമ്മിഷന്‍ അംഗീകരിച്ച തിരിച്ചറിയില്‍ കാര്‍ഡിന് പുറമെ മറ്റ് 11 രേഖകള്‍ ഉപയോഗിച്ചും വോട്ട് രേഖപ്പെടുത്താം. രാവിലെ പോളിങ് സ്റ്റേഷനുകളില്‍ മോക് പോളിങ് നടന്നു. കര്‍ശന കൊവിഡ്‌ മാനദണ്ഡങ്ങള്‍ പാലിച്ചാണ് വോട്ടെടുപ്പ് നടക്കുന്നത്.
ആലപ്പുഴയിലാകെ 2271 പോളിങ് ബൂത്തുകളാണുള്ളത്. എല്ലാ ബൂത്തുകളിലും വോട്ടെടുപ്പ് പ്രക്രിയ ആരംഭിച്ചു. കൊവിഡ്‌ മാനദണ്ഡങ്ങള്‍ പാലിക്കപ്പെടുന്നുണ്ടെന്ന് ഉറപ്പ് വരുത്താന്‍ ജില്ല ഭരണകൂടവും തെരഞ്ഞെടുപ്പ് ചുമതലയുള്ള ഉദ്യോഗസ്ഥരും നിരന്തര നിരീക്ഷണം നടത്തുന്നുണ്ട്. സംസ്ഥാന തെരഞ്ഞെടുപ്പ് കമ്മിഷനും ആരോഗ്യ വകുപ്പും നല്‍കിയ നിര്‍ദേശ പ്രകാരം ഒരു സമയം ബൂത്തിനുള്ളില്‍ മൂന്ന് പേര്‍ക്ക് മാത്രമാണ് പ്രവേശനം. എന്നാല്‍ ഇത് ചിലയിടങ്ങളില്‍ ബൂത്തിന് പുറത്ത് ആള്‍ക്കൂട്ടമുണ്ടാക്കുന്നുണ്ട്‌. കൂടാതെ ജില്ലയില്‍ പല ഭാഗങ്ങളിലും നേരിയ മഴ അനുഭവപ്പെടുന്നുണ്ട്. കൊവിഡ്‌ വ്യാപനവും മഴയും വോട്ടിങ്‌ ശതമാനത്തെ ബാധിക്കുമെന്ന ആശങ്കയിലാണ് രാഷ്ട്രീയ പാര്‍ട്ടികള്‍. തങ്ങളുടെ ഉറച്ച വോട്ടുകളെല്ലാം ആദ്യ റൗണ്ടിൽ തന്നെ പോൾ ചെയ്യുന്നുണ്ട് എന്നുറപ്പുവരുത്താൻ വിവിധ സ്‌ക്വാഡുകളായി തിരിഞ്ഞാണ് രാഷ്ട്രീയ കക്ഷികളുടെ പ്രവർത്തകർ പ്രവർത്തിക്കുന്നത്. പ്രായമായവരെയും കന്നി വോട്ടർമാരെയും ഓട്ടോറിക്ഷകളിലും ചെറുവാഹനങ്ങളിലുമായി പോളിങ് ബൂത്തിലേക്ക് എത്തിക്കുന്നുണ്ട്.
ഇടുക്കിയില്‍ 1453 ബൂത്തുകളാണ് ക്രമീകരിച്ചിരിക്കുന്നത്. ഇതില്‍ 197 പ്രശ്‌നബാധിത ബൂത്തുകളുള്ളതായി പൊലീസ് കണ്ടെത്തിയിട്ടുണ്ട്. കൊവിഡ്‌ മാനദണ്ഡങ്ങള്‍ പാലിച്ചാണ് തെരഞ്ഞെടുപ്പ് പ്രക്രിയ നടക്കുന്നതെന്ന് ഉദ്യോഗസ്ഥര്‍ ഉറപ്പ് വരുത്താന്‍ പ്രത്യേക നടപടികള്‍ സ്വീകരിക്കുന്നുണ്ട്‌.
അഞ്ച് ജില്ലകളിലായി 6911 വാര്‍ഡുകളിലേക്കാണ് വോട്ടെടുപ്പ് നടക്കുന്നത്. അഞ്ച് ജില്ലകളിലെ 318 ഗ്രാമപഞ്ചാത്തുകളിലെ 5280 വാര്‍ഡുകളിലേക്കും 50 ബ്ലോക്ക് പഞ്ചായത്തുകളിലെ 675 വാര്‍ഡുകളിലേക്കും അഞ്ച് ജില്ലാ പഞ്ചായത്തുകളിലെ 107 വാര്‍ഡുകളിലേക്കും 20 മുന്‍സിപ്പാലിറ്റികളിലെ 694 വാര്‍ഡുകളിലേക്കും രണ്ട് കോര്‍പ്പറേഷനുകളിലെ 155 വാര്‍ഡുകളിലേക്കുമാണ് ആദ്യഘട്ട തെരഞ്ഞെടുപ്പ്. ആകെ 395 തദ്ദേശഭരണ സ്ഥാപനങ്ങളിലേക്കുള്ള പ്രതിനിധികളെ തെരഞ്ഞെടുക്കുന്നതിനാണ് വോട്ടെടുപ്പ്.
ജില്ല തിരിച്ചുള്ള വാര്‍ഡുകള്‍; തിരുവനന്തപുരം-1727, കൊല്ലം-1596, പത്തനംതിട്ട-1042, ആലപ്പുഴ-1565, ഇടുക്കി-981.
